(Reportajen Jaime Pires/Editor Mateus da Cruz)
DILI (Timor Post)- Tuir planu hafoin to’o iha Aeroportu Komoro, Atleta no Delegasaun Timor Leste sei lori medalla-5 ne’ebé mak hetan iha Sea Games Vietname hodi halo konvoiu iha Dili laran.
“Aban Atleta sira to’o mai ita sei tara tais iha Aeroportu internasionál laran hafoin lori sai mai hodi halo konvoiu ka pawai iha Kapitál Dili laran,” dehan Prezidente Konfederasaun Desportu Timor-Leste (CDTL), Macário Floriano Sanches ba Jornalista sira iha edifísiu SEJD, Tersa (24/05).
Nia hatete, Rute ba aban Atleta no Delegasaun sira husi Sea Games hodi lori medalla lima ne’ebé mak sira hetan iha jogu ne’e hosi halo konvoiu mak husi Aeroportu Nicolau Lobato mai to’o iha Ponte BJ Habibie kontinua ba iha Ponte entre Hospital Nasionál Guido Valadares nian.
“Konvoiu husi Aeroportu Nicolau Lobato mai iha Ponte Habibie depois kontinua sa’e fali ba iha Ponte entre Hospital Nasionál Guido Valadares no tesik mai fali para iha Jináziu Desportu Dili ka (GMT),” nia dehan.
Karreta ba Atleta no Delegasaun sira atu sa’e hodi hamriik iha leten hodi halo konvoiu ne’e mós governu prepara hotu ona, kareta hanesan iha leten mamuk atu nune’e Atleta sira ne’ebé mak hetan medalla ne’e hamriik iha leten halo konvoiu hodi ema hotu bele koñese.
Prezidente Konfederasaun Desportu Timor-Leste (CDTL) husu ba komunidade tomak ne’ebé mak aban iha tempu livre bele ba iha Aeroportu Prezidente Nicolau Lobato hodi simu Atleta sira hodi akompaña halo konvoiu iha Kapitál Dili laran.
Enkuantu jogu Sea Games 2022 ne’ebé mak realiza iha Vietname ne’e Delegasaun Timor-Leste liu husi Atleta sira konsege hetan vitória hodi susesu hetan medalla osan mutin tolu no osan metan rua.
Medalla sira ne’e hetan husi Atleta husi federasaun sira mak hanesan, Federasaun Boxe Timor-Leste hetan medalla rua Osan Mutin ida no Metan Ida, Atletizmu hetan medalla mutin rua no federasaun Taekwondo hetan medalla osan metan ida.
Atleta no Delegasaun Timor-Leste sei to’o iha Aeroportu Komoro ho Aviaun Air Asian, maizumenus tuku 12 meiudia ne’e. (Lee Notísia Seluk Iha Jornál Timor Post/ Asesu You Tube Timor Post)
503 total views, 3 views today
