(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)– Membru Falintil-Forsa Defeza Timor-Leste (F-FDTL) na’in-11, ne’ebé kompete iha kompetisaun tiru amizade infantaria, iha Darwin Australia, konsege halakon forsa Amérika ho pozisaun segundu lugar, primeiru lugar maka Australia.
Membru F-FDTL nain-11 akompaña husi asesór Australianu no team kapten tenente Verdial da Costa, ne’ebé arranka ba Darwin Australia, iha loron 13 fulan Maiu tinan 2022.
Portavós F-FDTL, Kapitaun Infantaria Jose Antonio da Costa, informa katak, ohin ita nia militár ne’ebé mak foin daudauk dezloka ba Australia, hodi tuir kompetisaun tiru baibain bolu Australian Army Skills At Armies Meeting (AASAAM), ne’ebé mak kada tinan-tinan sempre hala’o iha Australia, nune’e konvida mós nasaun hotu-hotu atu ba partisipa, mais uma na’in maka Australia.
“Iha tempu ida ne’e, Timor-Leste nia reprezenta ekipa ida husi ita nia F-FDTL ne’ebé mak kompostu husi na’in-11, nune’e sira ba Australia hodi tuir kompetisaun ne’e. Ho ida ne’e, tuir loloos iha brigada hitu (7) iha Adelaide, maibé tanba situasaun dezastre naturais, entaun sira muda fali ba lima (5) ARAEA Real Australiana Argumenta, nune’e halo iha Darwin,” nia dehan ba jornalista sira hafoin simu na’in-11 ne’e iha Aeroportu Internasionál Nicolau Lobato Segunda lokraik ne’e, (23/05).
Nia subliña tan katak, kompetisaun tiru ne’ebé kompostu husi tiru indivíduu no grupu, membru F-FDTL konsege konkista primeiru lugar iha tiru indivíduu, ho kilat boot husi sarjentu ida, no tiru indivíduu ho pistola husi Kabu ida.
“Nune’e ita nia ekipa F-FDTL dezloka ba to’o iha Darwin, ho durasaun tempu semana ida nia laran, sira hodi tuir kompetisaun tiru ne’e, iha parte rua, primeiru maka indivíduu no grupu ou team. Iha individual ne’e, ita nia F-FDTL konsege konkista duni iha primeiru lugar, ba kilat boot ninian, ne’ebé mak mana’an husi ita nia sarjentu ida. Ho ida ne’e, tuir fali maka ita nia kabu ida, ne’ebé mak manan iha tiru pistola nian ne’e,” nia dehan.
Nia hatutan, durante sira tiru nee mós iha area defikadas, no mós distánsia ne’ebé mak sira tiru ba, hahú husi 100 metru to’o 300 metru.
“Enkuantu ba iha ekipa, ita Timor Leste, F-FDTL konkista iha segundu lugar, primeiru lugar maka Australia, segundu lugar maka Timor Leste no Terseiru maka Forsa Amérika,” nia relata.
Antes ne’e, membru F-FDTL nain-11 tuir treinamentu preparasaun ba kompetisaun Australian Army Skills At Armies Meeting (AASAAM) durante semana rua iha Metinaru Dili, konsege marka istória iha kompetisaun tiru amizade infantaria, ne’ebé realiza husi Forsa Australia.
“No antes ne’e, ba to’o prosesu ne’ebé mak foin daudauk ita boot sira asiste katak, konkista lubuk ida, ne’ebé mak maña’ an primeiru lugar iha Individual no segundu lugar ba iha ekipa, antes ne’e ita nia F-FDTL halo preparasaun treinu durante fulan rua nia laran, ita halo selesaun husi komponente unidade, to’o hetan na’in-24, durante fulan rua nia laran tais sira ne’ebé mak tiru di’ak, ita hetan na’in-11, ne’e maka ita haruka ba Australia, no sira fila mai ho rezultadu ne’ebé mak ita hare katak, sira mai lori dunik Medalla,” nia hakotu. (Lee Notísia Seluk Iha Jornál Timor Post/ Asesu You Tube Timor Post)
926 total views, 9 views today
