(Reportajen Jaime Pires/Editor Mateus da Cruz)
DILI (Timor Post)- Tanba atuál Ministru Asuntu Parlamentár no Komunikasaun Sosiál (MAPKOMS), Francisco Jerónimo, halo hela viajen ba estranjeiru, nune’e Primeiru Ministru (PM), ohin, orienta Sekretáriu Estadu Komunikasaun Sosiál (SEKOMS), Mericio Akara Sai Ministru interinu MAPKOMS, hodi reprezenta governu iha Parlamentu Nasionál (PN).
“Primeiru Ministru orienta ha’u hanesan Ministru Interinu MAPKOMS nia hodi ba Parlamentu koordena servisu didi’ak ho ita nia Parlamentu Nasionál,” dehan Mericio Akara iha Rezidénsia Primeiru Ministru, Faról, Segunda (23/05).
Akara hatete, servisu ne’ebé nia sei hala’o maka oinsá kooperasaun entre Parlamentu Nasionál ho governu di’ak liután inklui mós programa no lei sira ne’ebé mak governu propoin ba Parlamentu Nasionál bele hetan atensaun.
“Ne’ebé depois husi ne’e ha’u sei ba iha Parlamentu Nasionál hodi halo Komunikasaun ho Prezidente Parlamentu Nasionál hodi kontinua koopera malu di’ak liután,” deklara Nia.
Atu hakotu nia subliña, tanba durante loron hirak nia laran Ministru MAPKOMS sei ba iha rai li’ur ne’e nia parte mal sei sai Ministru Interinu hodi reprezenta governu akompaña debate iha Parlamentu Nasionál.
Enkuantu Ministru Asuntu Parlamentár no Komunikasaun Sosiál (MAPKOMS), Francisco Jeronimo ba iha Myanmar la’ós hanesan membru Governu maibé hanesan Prezidente Federasaun Futeból Timor-Leste (FFTL), hodi ko’alia asuntu Futeból .
Ministru Francisco Jerónimo arranka ona ba Myanmar iha loron sábadu (21/05) ne’e no sei fila fali mai iha Timor-Leste iha loron sábadu (27/05) semana ne’e. (Lee Notísia Seluk iha Jornál Timor Post/Asesu You Tube Timor Post)
864 total views, 6 views today
