(Reportajen Jeremias Soares/Editor Mateus da Cruz)
DILI-Universidade Nasionál Timor Lorosa’e (UNTL) ho parseiru G7+, Aban, Segunda (23/05), realiza konferénsia internasionál ho tema ‘Timor-Leste Two Decades of peacebuilding and statebuilding, challenges and opportunities’.
Semináriu ne’e sei abertura husi Prezidente Repúblika José Manuel Ramos Horta, iha Auditóriu Fakuldade Engenaria Siência no Teknologia UNTL – Hera.
Oradór Internasional no Nasional sira mak sei halo apresentasaun iha konferénsia refere. Partisipante sira maioria estudante UNTL nian no mós Universidade Privada sira inklui Estrutura Universidade nian, Dosente no konvidadu sira.
Momentu prinsipal ida ne’e, marka iha agenda hanesan loron dahuluk servisu Presidénsia nian.
Iha parte seluk G7+ no UNTL atribui konfiansa ba Grupu Korál Brilha Aakademika UNTL ho dirijente enjineiru Fidelis Xavier atu hananu Hino Nasional Patria.
“Atividade ida ne’e realiza tanba servisu konjunta ho G7+, CNIC, Gabinete Vise Reitóra ba Assuntu Estudantís, Sentru Estudu Arte no Kultura, Gabinete Vise Reitór ba Assuntu Administrasaun Finansas no Administradór Jeral, Diresaun Logistíka, Gabinete Apoiu Reitoria, Diresaun Mídia no IT UNTL nian inklui mós Telkomsel,”dehan Vise Reitora ba asuntu Estudantís, Enjineira Lígia Tomâs Correia ba Timor Post, Domingu (22/05).
Entretantu, antes ne’e Reitor UNTL, João Martins, hatete momentu ida ne’e importante tebes no Prezidente Repúblika disponivel atu halo abertura ba semináriu ne’e, inklui sei hato’o mós ninia vizaun no perspetiva kona-ba statebuilding, nationbuilding, peacebuilding iha Timor-Leste.
Tuir João, Timor-Leste hanesan pioneiru ba G7+, ne’ebé mak reúne nasaun frajil sira iha mundu tomak, tanba ne’e mak hakarak lori esperiénsia ne’ebé mak Timor-Leste iha para bele sai hanesan lisaun ida ba País ne’ebé mak halo parte iha G7+, au mézmu tempu internalmente atu haree oinsá konstrusaun Estadu Timor-Leste haree husi dezenvolvimentu pas no estabilidade no mós oinsá konstroi Estadu.
Nune’e mós, Sekretáriu Jerál G7+, Hélder da Costa, hatete eventu ida ne’e importante tebes tanba komemora tinan 20 restaurasaun independénsia, tanba ne’e to ona tempu atu halo balansu no halo reflesaun kona-ba dezafiu saida mak Timor-Leste enfrenta durante trajetória dezenvolvimentu iha tinan 20 liubá, inklui haree mós dezafiu ba oin. (Lee Notísia Seluk Iha Jornál Timor Post/Asesu You Tube Timor Post)
1,614 total views, 3 views today
Bele hare Video Seluk :