(Reportajen Jaime Pires/Editor Mateus da Cruz)
DILI (Timor Post)- Prezidente Repúblika (PR), José Manuel Ramos Horta, hatete, nia sei koopera ho governu kria kampu servisu ba joven sira hodi hadi’a joven sira nia mehi.
“Ha’u sei servisu hamutuk di’ak liután ho governu hodi kria kampu traballu barak ba Joven sira tanba ida ne’e mak sira nia mehi, inklui agrikultura peska seguransa no alimentár, tanba ita hatene ona udan dala ruma laiha, dala ruma mo’s udan barak liu no funu iha nasaun seluk fó impaktu mai ita nia povu,” nia dehan iha diskursu hafoin serimónia investidura iha Tasi-Tolu, Kinta, (19/05).
Horta hatete, programa hirak ne’e presiza implementa hodi asegura ba futuru labele afeta krize ekonomia ba povu no rai ida ne’e.
Alende kampu servisu, Prezidente Repúblika mós promete sei tau matan ba dezenvolvimentu iha munisípiu sira hanesan Bobonaru, Kovalima no RAEOA.
“Ha’u mós kontinua servisu ho governu hodi kontinua dezenvolve Oe-Kusi Ambeno maibé tau matan mós ba Kovalima no Bobonaru inklui fronteira sira hotu, ita tau matan hodi bele dezenvolve,” subliña Nia.
Tanba Timor-Leste iha polítika ne’ebé mak dinamika duni maibé sei mukit hela, entaun atu proteje demokrasia ida ne’e sai mós hanesan prioridade ida nia hanesan Prezidente Repúblika foun.
“Tanba ne’e iha ha’u nia mandatu iha espiritu unidade ne’ebé saudavel ne’ebé mak posivel hodi ha’u bele konxiente, ha’u fó avizu labele iha ema balun halo aproveitamentu ba ita nia demokrasia ida ne’ebé mak sei frazil,” deklara Horta.(Lee Notísia seluk Iha Jornál Timor Post/Asesu You Tube Timor Post)
750 total views, 3 views today
Bele hare Video Seluk :