(Reportajen Estaziadu Mariano Abi/Asistente Editor Hermenegildo da costa Tilman)
Dili (Timor Post)–-Governu liu husi Ministériu Edukasaun Juventude no Desportu (MEJD) asina akordu ho Asosiasaun Komersiál Komunidade Xineza iha Timor Oan (ACCCTO- sigla portugés), hodi haforsa Setór Edukasaun iha rai laran liu-liu dezenvolve hikas eskola antiga Xineza iha rai laran.
“Dezde 1975 komunidade Xineza iha momentu ne’ebá, eskola ne’ebé mak iha Dili no munisípiu sira hotu, maibé depois de to’o 1975 istória ne’e kotu, no liu tiha kuaze tinan 50 to’o 2022 ne’e maka ita hatutan fila fali istória ida ne’e.,” Ministru Edukasaun Juventude no Desportu (MEJD), Armindo Maia liu husi ninia diskursu iha Suai Room, Timor Plaza, (18/05).
Ministru ne’e hatete, ACCCTO ninia istória nia la duun hatene, maibé tinan atus hirak liu ba komunidade Xineza tama iha Timor ne’e nia abut kle’an iha Timor-Leste.
“Depois de ha’u simu kargu hanesan Ministru MEJD reprezentante husi komunidade Xineza mai hasoru kedas ha’u hodi hala’o diskusaun, kona-ba oinsá mak bele dezenvolve fila fali Eskola China iha Nuu Laran depois de tinan 50 liu ba kotu”, nia dehan.
“Ita mós hanesan Governu tenke simu mós apoiu polítika no moral, husi Primeiru Ministru, Taur Matan Ruak, nune’e mós Dr. Mari Alkatiri, husi sira ne’e maka dudu ami husi kotuk, ho ida ne’e maka ohin ita hotu-hotu bele asina akordu ida ne’e, hodi bele kesi ita parte rua maka, MEJD entre ACCCTO hodi bele hakat ba oin,”
Iha tempu hanesan Prezidente ACCCTO, Kathleen Gonçalves, hatete, serimónia ne’e importante tebes no sai hanesan istória ida ba komunidade Xineza sira iha Timor Leste no mós ba rai doben Timor Leste.
“Ohin loron asina MoU ho MEJD kona ba Eskola Xineza Sub-filial Bázika agora konsentra iha Nuu Laran, hanesan Eskola antiga Xinezaiha kapitál Dili. Objetivu ne’e maka ACCCTO halo kooperasaun entre MEJD, hodi dezenvolve no transforma eskola refere, atu nune’e eskola ne’e sai referénsia ida hanesan eskola publika ho ninia jestaun Privadu,” nia dehan.
Iha akordu ida haktuir planu estratéjiku no hatuur kedas ona katak, sei tuir kurríkulu nasionál, no sei aumenta komplementár iha area Edukasaun nia hatete. (Lee Notísia Seluk Iha Jornál Timor Post/ Asesu You Tube Timor Post)
890 total views, 6 views today
Bele hare Video Seluk :