(Reportajen Jaime Pires/Editor Mateus da Cruz)
DILI (Timor Post)- Prezidente Repúblika Portugál, Marcelo Rebelo, Kinta (19/05), dadeer ne’e, to’o ona iha Aeroportu Prezidente Nicolau Lobato Komoro, ho aviaun EUROATLANTIC.
Xefe Estadu Portugál to’o iha Timor-Leste tuir duni ajenda ne’ebé mak iha hodi konsege tun iha Aeroportu Nicolau Lobato iha tuku 06:30 dadeer ne.
Hafoin tun iha Aeroportu simu kedas husi Vise-Primeiru Ministru no Ministru Planu Ordenamentu Teritoriu José Reis, no simu hasoru ho kultura Timor-Leste nia hanesan dansa kultura no balu babadok.
Tuir observasaun Timor Post, hafoin Xefe Estadu Portugál sama ain iha Aeroportu ho laran kontente hodi hasai foto ho timoroan sira no hatudu nia simplisidade tanba sa’e tiha karreta tun fali hodi hasai foto ka selfie iha Aeroportu Komoro.
Hafoin sai husi Aeroportu laran akompaña kedas husi seguransa pesoál sira ne’ebé mak governu prepara inklui membru Polisia Nasionál Timor-Leste (PNTL), akompaña hodi mai deskansa iha fatin ne’ebé mak governu prepara iha Hotel Timor.
Tuir ajenda orasida tuku lima loro kraik Prezidente Portugál ne’e sei ba vizita eskola CAFE de Taibesi.
Fó hanoin fali katak Xefe Estadu Portugál ne’e mai Timor-Leste hodi partisipa serimónia Investidura ba Prezidente Repúblika eleitu José Manuel Ramos Horta, nune’e mós atu partisipa serimónia komemorasaun loron Restaurasaun Independénsia Timor-Leste 20 de Maiu ba dala-20.(Lee notisia seluk iha Timor Post/Asesu You Tube Timor post)
746 total views, 3 views today
