(Reportajen Estaziadu Mariano Abi/Editor Mateus da Cruz)
Dili (Timor Post) – Asosiasaun Turizmu Relijiozu (ATR-TL) no Turizmu Ba Ema Hotu (TBEH), realiza konkursu públiku hodi hili foin sa’e na’in rua hodi sai Ambassador turizmu ba ema hotu ba períodu 2022-2023.
Prezidente ATR-TL, Padre, Angelo Salsinha, hatete, kompetisaun ida ne’e hala’o ba públiku liu-liu ba joven sira ne’ebé maka iha potensialidade hodi promove turístiku iha Timor Leste.
“Ha’u hanoin kompetisaun ne’e importante tebes, atu ita hili joven sira ne’ebé iha potensiál no koñesimentu kona-ba ita nia turizmu iha rai laran,” nia dehan ba jornalista sira iha Timor Plaza, Tersa (17/05).
Pe, Angelo dehan, agora daudaun konkursu ne’e sei hahú ho universidade sira iha Timor Leste, maibé ba oin sei halo mós foin sa’e sira iha munisípiu, atu nune’e komunidade no grupu kategoria sira bele partisipa hotu.
Daudaun ne’e ATR-TL halo hela levantamentu dadus ba munisípiu lima, iha peskiza ne’e hodi munisípiu ida-idak ninia fatin turístika, liu-liu Turizmu Relijiozu. Munisípiu lima ne’e maka hanesan Dili, Manatutu, Ermera, Ainaru no RAEOA.
“Ezemplu Ainaru foka liu ba Ramelau, Manatutu foka liu ba Nossa Señora Ai- tarak, Ermera foka Iiu ba Nossa Señora Fatubesi, ida ne’e, mak ita nia tarjetu, tan nee sei forma núkleu iha fatin hirak ne’e, hodi halo servisu, hanesan pakote, istória ba fatin ida, ho nune’e, aban bainrua bele sai hanesan pakote ida, tan ne’e agora tenke kapasita ona joven sira ne’e,” nia relata.
“Agora daudaun forma ona ema na’in-2 kada Munisípiu, Aban bainrua mós na’in-2 ne’e sei ba multiplika tan, hodi ema sai barak iha ne’ebá no komunidade sira, atu nune’e sira hamutuk hodi forma núkleu mais ida ne’ebé mak integradu, hodi ko’alia kona-ba ritus rekursu turizmu relijiozu ne’ebé mak iha,” hatutan.
Iha fatin hanesan, Xefe USAID’s Tourism For All Project, Peter Semone, hatete, objetivu hosi atividade ida ne’e atu nomeia joven na’in rua hodi halo promosaun ba turizmu iha Timor Leste.
“Ami hakarak hetan joven balu, ne’ebé mak halo promosaun ba Turizmu ninian iha rai laran,” nia dehan.
Tuir nia, kompetisaun ida ne’e importante tebes atu joven sira bele iha koñesimentu di’ak kona-ba setór turizmu iha rai laran no oinsá sira bele halo promosaun turizmu rai laran ba rai li’ur hodi atrai vizitante sira. (Lee Notisia Seluk Iha Jornal Timor Post/ Asesu You Tube Timor Post)
822 total views, 3 views today
Bele hare Video Seluk :