(Reportajen Cardenio Alves/ Asistente Editor Hermenegildo da Costa Tilman)
Dili (Timor Post)- Asosiasaun Halibur Defisiénsia Matan Timor-Leste (AHDMTL), lamenta ho apoiu Orsamentu hosi Ministeriu Solidadiredade Sosial no Inkluzaun (MSSI) ba instituisaun solidariedade sira liu-liu ba Ema ho Defisiénsia ki’ik liu nune’e prejudika ba programa ne’ebé atu implementa iha tinan ida ne’e.
“Orsamentu tinan ne’e kompara ho tinan kotuk lahanesan, tanba tinan kotuk EhD hetan 63.296 USD, maibé ba tinan ne’e sira hamenus tan 30% ba 44.504 USD”, dehan Diretór Asosiasaun Halibur Defisiénsia Matan Timor-Leste (AHDMTL), Gaspar Afonso, iha Salaun MSSI, Kaikoli.
Lee Notisia Relevante : MSSI Asina Akordu Kooperasaun ho Instituisaun 29
Tuir planu EhD nian tinan ne’e sei lori Ema ho Defisiénsia sira ba tuir kursu komputadór iha Indonézia, maibé tanba orsamentu ba tinan ne’e ki’ik tebes, nune’e programa sira ne’ebé EhD atraza ona iha tinan ida ne’e difisil realiza.
“Ita haruka ona karta ba Primeiru Ministru, Presidente Repúblika, Parlamentu Nasionál no Ministra Solidariedade Sosiál no Inkluzaun rasik atu hasa’e orsamentu ba apoiu Instituisaun ne’e, maibé Governu rasik la tau seriedade ba orsamentu ne’e”, nia subliña.
Tuir nia, maski orsamentu ne’e ki’ik maibé sei la hamate EhD nia luta no vontade maibé EhD sente triste tanba governu rasik la tau prioridade, sira dehan Inkluzaun maibé sira lahatene saida mak Inkluzaun. Nia hakotu (Lee Notísia Seluk Iha Jornál Timor Post/Asesu You Tube Timor Post)
567 total views, 3 views today
