(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)–Sekretáriu Estadu Igualdade Jéneru (SEII) hamutuk ho Ministériu Solidariedade Sosiál no Inkluzaun (MSSI) no Ministériu Saúde sei funsiona uma mahon sira ne’ebé eziste iha munisípiu sira nune’e bele halo atendementu ba kazu Violénsia Bazeia ba Jéneru (VBJ) hasoru feto no labarik feto sira.
“Uma mahon sira iha munisípiu sira inklui Dili, sei funsiona atu fó apoiu ba iha vítima sira ne’ebe presiza protesaun no presiza mahon atu hela ba tempu ruma no ba kazu ruma relasiona no Violénsia Bazeia ba Jéneru,” dehan Diretór-Jerál SEII, Armando da Costa, ba jornalista sira hafoin remata enkontru ONU ho KOICA, iha Maubara Room Timor Plaza, Tersa (10/05).
Nia hatete, uma mahon iha Dili no mós iha munisípiu sira maioria hala’o husi parte sosiedade sivíl, ne’ebé mós hetan apoiu husi governu.
Alende ne’e mós, Ministériu Saúde (MS) kria ona planu hodi tau orsamentu atu bele harii tan uma mahon ba iha munisípiu hotu-hotu, hodi bele fó tratamentu ou asisténsia ba kazu Violénsia Bazeia ba Jéneru.
Tuir Vice Ministru Saúde (MS) Bonifásiu Maukoli dos Reis, hatete, daudaun ne’e parte MS kria ona planu orsamentu atu bele harii tan uma mahon iha munisípiu sira.
“Iha tinan ida ne’e Ita sei halo tan uma mahon atu nune’e iha munisípiu hotu tenke iha uma mahon, para bainhira akontese Kazu VBJ iha fatin mahon ruma atu bele halo tratamentu,”
Vice Ministru MS, hatutan, iha munisípiu hitu (7) mak agora daudaun eziste ona uma mahon mak hanesan husi Munisípiu Ermera, Likisa, Kovalima, Dili, Bobonaru, Vikeke no RAEOA. Funsionamentu agora la’o hela iha Uma mahon.
“Kona ba rekursu no fasilidade ba ekipamentu husi parte Profisionál saúde sira mak atende, ne’ebe mak iha disponivel atu bele halo atendementu ba kazu ne’ebe akontese,” nia tenik. (Lee Notísia Seluk Iha Jornál Timor Post/ Asesu You Tube Timor Post)
873 total views, 3 views today
Bele hare Video Seluk :