(Reportajen Cardenio Alves/Asistente Editor Hermenegildo da Costa Tilman)
Dili (Timor Post)—Forum Organizasaun Non-Governamentál Timor Leste (FONGTIL), servisu hamutuk ho Ministériu Saúde (MS), no United Estates Agency International Development (USAID), ohin halo lansamentu ba liña koordenasaun Rede ba Saúde iha Timor Leste (TL), hodi hala’o servisu saúde diak liu tan.
“Fongtil hanesan parseiru krítiku ba governu, husu ba Ministériu Saúde tenke halo liña koordenasaun ho Rede ba Saúde Timor Leste (Rebas-TL), atu bele servisu hamutuk iha fatór saúde nian hodi bele hadi’a sistema saúde no mellora iha futuru”, hatete husi Diretora Ezekutiva Fongtil, Elizabeth Lino de Araújo, iha Timor Plaza Dili, Kinta, (05/05).
Tuir Diretora Ezekutiva hatete, Rebas-TL, iha parseria Fongtil ho misaun atu halo advokasia ba setór saúde, tanba iha setór saúde buat barak mak Ministériu Saúde halo ona, maibé hari Rebas-TL atu halo diak liu tan ba sistema saúde iha TL.
Ho prezensa Rebas-TL atu halo atendementu ne’ebe adekuadu, hodi ajuda ba fatór saúde sira iha terenu, tanba daudaun ne’e ita hare servisu saúde seidauk adekuadu loloos. Nia dehan
Alende ne’e mós reprezentante Ministra saúde, Vise-Ministru Bonifácio Maukoli dos Reis hatete, Objetivu iha setór saúde mak asegura no kobertura universal saúde ho kualidade saúde primária no promove utilizasaun adekuada kuidadu ospitál sira, ne’ebé koloka indivíduu iha sentru atensaun ba setór saúde sira.
“Oinsá ita atu hadi’a no asesu ba servisu saúde, haforsa no hasae servisu saúde, reforsa no dezenvolve rekursu umanu ba saúde, hodi haburas partisipasaun komunitaria iha saúde, no fortaleza sistema saúde iha jestaun servisu nasionál saúde ita presiza koopera malu ho ONG sira hodi hadi’a kualidade saúde diak liu tan iha futuru mai” nia subliña.
Iha fatin hanesan Embaixadór Estadus Unidus Amérika (EUA), Tom Dalay, hatete, ami orgullu hodi apoiu ONG lokál sira atu halo advokasia hodi atinje prestasaun saúde ida ne’ebé di’ak liu ba Timor oan hotu nia diak.
“Estadus Unidus Amérika sei kontinua atu hamriik ho Timor Leste nu’udar belun ho parseiru hodi servisu hamutuk atu haforsa seguransa saúde no atu hadi’a komunidade nia bens-estar iha territóriu Timor laran tomak”. Nia dehan.
Embaixadór EUA ne’e hatete, governu Amérika nia misaun iha Timor-Leste liu-husi ajénsia ba dezenvolvimentu internasionál (USAID), kontribui fundus millaun 92 USD, hahú iha tinan 2021 to’o 2025 hodi haforsa ekonomia no boa-governasaun iha TL.
Dezde TL nia independénsia EUA kontribui ona liu millaun 250 USD hodi apoiu dezenvolvimentu ida ne’ebé inkluzivu no hakmatek ba TL ida ne’ebé prósperu, saudavel no auto-sufisiente. (Lee Notísia Seluk Iha Jornál Timor Post/Asesu You Tube Timor Post)
1,168 total views, 3 views today
Bele hare Video Seluk :
Subscribe to Timorpost
