(Reportajen Jaime Pires/Editor Mateus da Cruz)
DILI (Timor Post)- Komandu Polísia Nasionál Timor-Leste (PNTL), liuhusi Servisu Investigasaun Kriminál, halo identifikasaun ba veteranu falsu ISR ne’ebe mak durante ne’e halo kobransa ilegál ba komunidade sira.
“Horisehik iha komandu jerál liuhusi servisu investigasaun kriminál, halo identifikasaun ba ita nia sidadaun balun ne’ebé mak durante ne’e halo kobransa ilegál no komunidade sira barak mak sai vítima,” dehan Portavós Komandu Jerál PNTL, Superintendente Xefe, Armando Monteiro, liuhusi konferénsia imprensa, Kuarta (04/05).
Nia dehan, aktu sidadaun ida ne’e hamosu preokupasaun ba ema barak tanba lori lideransa sira hotu nia naran hodi bosok komunidade sira halo kobransa ilegál iha territóriu laran tomak hodi hetan lukru.
Tanba ne’e Polísia Nasionál Timor-Leste no FALINTIL Forsa Defeza Timor-Leste, halo kooperasaun hodi hare ba aktu ida ne’e tanba, aktu ida ne’e bele hamonu kredibilidade instituisaun rua ninian.
Agora daudaun suspeitu kontinua submete hela ba prosesu investigasaun.
Tuir observasaun ne’ebé mak Timor Post horisehik akompaña iha terrenu, Polísia Servisu Investigasaun Kriminál, atu ba kaptura suspeitu (ISR) nia fatin iha Bebonuk maibé suspeitu la’o sees hodi mai entrega an de’it iha Edifísiu Polísia Servisu Investigasaun Kriminál, Kaikoli hodi submete ba prosesu investigasaun.
PNTL halo identifikasaun ba suspeitu refere tanba lori líder Nasionál sira nia naran hanesan, Xanana Gusmão, Taur Matan Ruak no Lere Anan Timur, hodi bosok ema barak hodi hatama osan atu halo uma.
Suspeitu mós bosok ema dehan parte Indonézia besik lori fila, Nicolau Lobato, Daitula, Nino Konis Santana no sira seluk tan mai Timor-Leste, tanba seidauk mate.
Nune’e mós nia bosok, vitíma sira katak, nia ema veteranu no ema konfiansa lider sira nian, dezde tinan 1975 to’o ohin loron.
Iha identifikasaun ne’e, PNTL konsege rekolla kartaun barak inklui dokumentu sira ne’ebé mak nia lori hodi bosok ema hatama osan.
567 total views, 6 views today
Bele hare Video Seluk :