(Reportajen Estaziadu Cardenio Alves/Editor Mateus da Cruz)
DILI (Timor Post)-Governu liu hosi Ministériu Transporte Komunikasaun, lansa medida hodi apoiu operadór transporte públiku sira no setór atividade sira seluk, tuir dekretu lei Nu. 18/2022, kona-ba atribuisaun subsídiu sira atu hamenus impaktu hosi aumentu presu kombustivel nian sira, tanba guerra iha Ukránia.
“Komunikasaun ida ne’e atu Ita uza hodi garante estabilidade presu kombustivel nian no hodi evita konsekuénsia prejudisiál sira ba ekonomia no ba konsumidór sira, Governu deside halo intervensaun iha merkadu kombustivel sira liuhusi atribuisaun subsídiu sira”, hatete husi Ministru Transporte no Telekomunikasaun, Agostinho da Silva, iha nia knaar fatin Kaikoli, Kinta, (28/04).
Nia hatete, medida ida-ne’e sei benefisia setór atividade sira ne’ebé atinjidu liu ba folin kombustivel nia aumentu, hanesan operadór transporte Rodoviário, transporte Aéreu no Marítimu nasionál sira no ba kompradór sira kombustivel nian ne’ebé destina ba atividade agríkola no peska nian.
Subsídiu ne’e sei halo liuhusi vale deskontu nian (voucher) ida atu uza iha estasaun sira ne’ebé maka fa’an kombustivel ho ninia montante ne’ebé korrespondente ba 100X husi valór diferensa nian entre folin médiu gazolina ka gazóleu litru ida nian, iha fulan Dezembru tinan 2021 no folin gazolina litru ida nian iha data fó sai voucher kombustivel nian ho konsiderasaun ba tipu kombustivel nian no ninia karakterístika sira. Signifika katak, medida ida-ne’e sei permite katak benefisiáriu sira sei selu de’it valor médiu kombustivel nian husi fulan Dezembru tinan kotuk.
Ministériu Transporte no Komunikasaun maka responsavel ba pagamentu subsídiu ba operadór transporte Rodoviáriu públiku nian sira, ba operadór transporte Aéreu no Marítimu nasionál sira.
Entretantu Ministériu Agrikultura no Peska maka responsavel ba subsídiu ba kompradór kombustivel ne’ebé maka destina ba atividade agríkola no peska nian, atu besik remata prosedimentu sira ne’ebé nesesáriu hodi la kleur tan bele hahú pagamentu subsídiu ne’e.
Dekretu-Lei Nu. 18/2022, husi 19 fulan Abríl, ne’ebé estabelese subsídiu sira ne’e governu aprova ona iha soru mutu Konsellu Ministru nian iha loron 13 fulan Abríl tinan 2022 no promulga husi Prezidente Repúblika nian iha loron 19 fulan Abríl tinan 2022.
869 total views, 3 views today
