(Reportajen Mateus da Cruz)
Dili (Timor Post)— Prezidente eleitu Ramos Horta, Kuarta ne’e hakat ba Palásiu Prezidénsia Repúblika hodi hasoru malu ho Prezidente Repúblika Francisco Guterres Lú Olo, iha hasoru malu ne’e lider na’in rua ko’alia liu kona-ba preparasaun pose Prezidente eleitu nian iha 20 de Maiu no preparasaun ba diálogu entre lider sira.
Tuir informasaun ne’ebé asesu liu hosi Mídia PR nian iha Palasiu Prezidensiál, Prezidente Repúblika eleitu kontente tebes ho Prezidente Repúblika atuál tanba simu delegasaun ho di’ak tebes no ho admirasaun tanba sei kontinua koopera ho instituisaun estadu nian atu bele la’o ba oin ho susesu.
“Simu ha’u ho delegasaun di’ak tebetebes, pozitivu. Nu’udar lideransa nasionál. Primeira objetivu mak prosesu hand-over, serimónia 19 maiu, 20 maiu atu la’o didiak, dignidade estadu nian, povu nian, sosiedade nian. ”dehan Ramos Horta hafoin remata enkontru ho Lú Olo.
Nia hatete, “Ha’u-nia admirasaun respeitu ba Prezidente, oferese-an atu ba oin, buat ne’ebé Prezidente presiza, ha’u nu’udar Xefe Estadu ou nu’udar individuál bele konta ho ha’u. Ha’u mós espera que kaer knaar ne’e, ha’u sei konsulta ho Prezidente ba oin kestoens nasionál ou kestaun internasionál sempre buka rona Prezidente sesante,”
Nia parte sei kontinua buka diálogu tuir buat ne’ebé promove tiha ona husi Prezidente Repúblika Lú Olo, nu’udar dalan atu buka solusaun bainhira Estadu hasoru dezafius oinoin iha prosesu dezenvolvimentu nasionál.
“Ha’u sei husu ba Prezidente nia tulun no apoiu para ita buka halo diálogu ho líder nasionál sira, ho partidu sira iha Parlamentu, iha li’ur para oinsá ita haklean demokrasia, haklean dame, hametin dame, haree oinsá ita boot ita-nia ekonomia ne’e didi’ak la’o ba oin,” nia dehan.
Prezidente eleitu ho nia delegasaun hala’o ona kontaktu ho lider balun no halo ona enkontru ho elementu balun governu nian oinsá prosesu tranzisaun, serimónia 19 no 20 maiu bele la’o ho di’ak.
Ramos Horta hatete katak serimónia investidura ne’ebé hala’o iha 19 Maiu 2022 sei prezide husi Prezidente Parlamentu Nasionál Aniceto Guterres.
“Serimónia de posse sei prezididu husi Prezidente Parlamentu atuál. Tinan rua mai ne’e nia mak diriji, serbisu, atividade Parlamentu nian. Nia mak sei prezide serimónia tomada de posse tuir nia knaar. Prezidente Aniceto Guterres mak iha tinan rua mai ne’e mak diriji traballu Parlamentu nian. Nia sei kontinua ho traballu ida ne’e,” katak nia.
Serimónia investidura ba Prezidente Repúblika sei hala’o iha 19 maiu 2022, iha Tasi-Tolu no serimónia Restaurasaun Independénsia iha Palásiu Prezidensiál Nicolau Lobato, iha 20 maiu 2022.(Lee Notísia Seluk Iha Jornál Timor Post/Asesu You Tube Timor Post)
705 total views, 3 views today
Bele hare Video Seluk :