(Reportajen Sergio De João Batista Lelan/Asistente Editor Hermenegildo da Costa Tilman)
Dili (Timor Post)—Hafoin kumpre regra hirak ne’ebé estabelese iha nasaun ne’e, governu ofisialmente fó sai katak Organizasaun Arte Marsiais tolu kompostu hosi Organizasaun Arte Marsiais Persaudaraan Setia Hati Terate (PSHT), Ikatan Keluarga Kera Sakti (IKS-PTL) no Kmanek Oan Rai Klaran (KORK), hetan ona legalidade no bele hahú sira nia atividade prátiku iha terenu.
Prezidente Komisaun Regulador Arte Marsiais (KRAM), Octavio Da Conceição, hatete, Arte Marsiais PSHT IKS-PTL no KORKA hetan ona legalidade tuir rezolusaun númeru 16/2013, tanba ne’e organizasaun arte marsiais tolu ne’e bele reativa fali sira nia atividade hanesan baibain.
“Komisaun KRAM iha oportunidade ida ne’e, hakarak informa ba públiku en jerál katak, Oitavu Governu Konstitusionál dezde 2020 hasai rezolusaun númeru 4 /2020, ne’ebé revoga rezolusaun númeru 16/2013 kona-ba estensaun grupu arte marsiais nian apela ba Públiku Timor laran tomak katak organizasaun 3 ne’e hetan on legalidade husi Governu hodi bele hala’o sira nia atividade treinu”, nia dehan jornalista sira iha Sede KRAM, Kuarta (27/04).
Nia dehan, Iha 2020 SEJD hahú hamutuk ho komisaun KRAM, hahú loke prosedimentu administrativu hodi hahú prosesu rejistu, ré-rejistu no re-atualizasaun ba dadus organizasaun arte marsiais sira ne’ebé naran temi ka indika iha rezolusaun númeru 4/2020.
Lori tinan ida tomak dezde 2020 mai to’o 2021 Komisaun KRAM publika sai primeira diretiva, númeru 1, kona ba prosesu rejistu, re-rejistu no re-atualizasaun dadus, mai to’o tinan ida ne’e maka organizasaun tolu, PSHT, KORKA no IKS-PTL bele hetan ona sira nia legalidade iha Ministériu Justisa ne’ebe publika sai ona iha jornál da repúblika.
Nune’e, Iha tinan ida ne’e Komisaun KRAM publika diretiva daruak liu-husi despaxu Sekretáriu Estadu Juventude no Desportu, Abrão Saldanha ne’ebe publika sai iha jornál da repúblika dezde horisehik.
“Komesa horisehik fó sai iha jornál da repúblika segunda reativa ba autorizasaun instrusaun ba prosedimentu autorizasaun ka formasaun ba atividade arte marsiais no mós delegasaun ba kompeténsia sira ba estrutura KRAM sira iha nivel munisípiu sira,” nia dehan.
Iha segunda reativa ne’e mós hatuur ona prosedimentu lubuk ida nu’udar mata dalan ba organizasaun arte marsiais ne’ebe hamahan an iha federasaun silat Timor-Leste nian, mata dalan sira ne’e lori ba sira atu hahú prosesu resenseamentu ba atualizasaun membru sira nian iha nivel organizasaun ida-idak ninian.
“Ami mós fó sai mata dalan ida ne’e atu bele lori nafatin maluk sira ne’ebe pratika arte marsiais liu-liu ba organizasaun ne’ebé hamahan an iha Federasaun Silat Timor-Leste (FESTIL) nia okos atu kumpre no halo tuir segunda reativa ida ne’e hodi hein lei própria kona-ba pratika arte marsiais nian sei iha prosesu ne’ebé sei publika sai iha tinan ida ne’e nia laran”.
Prezidente KRAM hakarak informa ba lideransa organizasaun arte marsiais hotu ne’ebe iha (FESTIL) nia okos, katak, maski iha ona atualizasaun KRAM husu ba lideransa sira atu kontinua koopera hamutuk ho entidade estadu tomak liu-liu komandu PNTL iha nivel munisípiu sira atu bele asegura pás no estabilidade. (Lee Notísia Seluk Iha Jornál Timor Post/Asesu You Tube Timor Post)
1,056 total views, 3 views today
Bele hare Video Seluk :