(Reportajen Cardenio Alves/Editor Mateus da Cruz)
DILI (Timor Post)—Tanba folin mina sa’e no pasajeiru sira selu la tuir regra, kondutór mikrolete iha kapitál Dili halo greve hodi ezije governu hasa’e tarifa ba estudante sira ba sentavu 20 USD no ba funsionáriu públiku kontinua sentavu 25 USD.
” Ami husu atu estudante ka funsionáriu sira hasae tarifa ba 20 no 25 sentavu, tanba ami bazeia ba presu kombustivel ne’ebé sa’e iha nasaun TL no mós mundu internasionál sira hotu, la’ós ami naran ezije”, dehan Portavós iha Fatin Greve, Komoro, Tersa, (26/04).
Lee Notisia Relevante : Folin Kombustivel Sa’e, Mikrolete Iha Dili Greve
Nia hatete, daudaun ne’e kombustivel sa’e ba 1.37 sentavu lahanesan tempu uluk 90.8 sentavu, entaun bazeia ba ida ne’e maka kondutór sira hakarak husu ba governu atu hasae tarifa estudante selu 20 sentavu no funsionáriu selu 25 sentavu.
Kondutór mikrolete halo asaun ne’e tanba konsidera LAJR halo diskriminasaun ba sira. LAJR foin daudaun hasai karta ida ba transporte rodaviariu hanesan Bus iha Munisípiu hotu-hotu hasa’e, maibé la aplika mós ba mikrolete sira iha Dili laran.
“Ami husu ba governu tenke buka solusaun ba presu kombustivel ne’ebé sa’e maka’as iha TL ho nune’e bele rezolve ami nia ezijénsia, karik la iha alternativu ruma husi governu, ami sei para total de’it iha uma “, nia hatete.
Iha fatin seluk, Estudante Universidade da Paz (UNPAZ), Zelia dos Santo, sente triste bainhira transporte sira halo greve, tanba fó impaktu ba sira atu ba eskola.
“Ami konfunde liu ba mikrolete sira ne’ebé greve no lakohi tula pasajeiru sira iha Dili laran, hanesan estudante sente triste bainhira la’o de’it,”nia dehan.
Nia husu ba governu atu buka solusaun liu-liu ba presu Mina ne’ebé sa’e maka’as hodi nune’e labele fó impaktu ba povu.(Lee Notísia Seluk Iha Jornál Timor Post/Asesu You Tube Timor Post)
968 total views, 3 views today
Bele hare Video Seluk :