(Reportajen Sergio De João Batista Lelan/Asistente Editor Hermenegildo da Costa Tilman)
Dili (Timor Post)—Impaktu hosi menus transporte marítima, halo komunidade no estudante barak maka butuk de’it iha Portu Dili no Mahata, hodi hein bainhira los maka bele halo viajen.
Portavós Movimentu Estudante Tane Oekusi (METO) Mateus Lopo, hatete, relasiona ho polítika governu da-VIII liuhusi Ministériu Administrasaun Estatál (MAE), iha loron 14 fulan Abríl tinan 2022, anunsia ba eleitór sira husi munisípiu 12 prepara kamioneta 110 hodi transporta sira ba ezerse sira nia direitu síviku iha munisípiu ida-idak.
“Maibé komunidade husi rejiaun administrativu espesiál Oekusi Ambenu (RAEOA), diskriminadu iha tratamentu polítika ne’e, tanba iha loron 17-18/04/2022 komunidade no estudante Oekusi oan kuaze 2000 buka alternativu rasik hodi ba partisipa loron eleisaun, “dehan ba jornalista sira iha jardín 5 de Maiu, Segunda (25/04).
Nia haktuir, maski oras ne’e daudauk ezerse ona direitu síviku no termina ona rezultadu eleisaun ba prezidente da repúblika períodu tinan 2022-2027 maibé komunidade no estudante Oekusi oan sei dilematiku no halerik atu fila mai kapitál Dili hodi kontinua servisu no estudu, tanba iha problema husi ró.
Nia subliña, la iha transporte marítimu adekuadu bele transporta hikas estudante no komunidade mai Dili, Ró-ahi Berlin Ramelau hetan ona estragu iha loron 17/04/2022 iha portu Kitahara Mahata Oekusi, agora laiha nesesidade atu halo movimentasaun.
Nia lamenta, Barco Rápidu (Kapal cepat) laiha kapasidade hodi transporta estudante no komunidade sira ho númeru boot iha tempu badak, ho presu billete ne’ebé karun 15 ate 25 USD fó impaktu ba estudante sira labele viajen, no aviaun ZEESM ho presu billete 45 USD dollar ami estudante no povu kbiit laek labele asesu.
Ho problema hirak ne’e, METO, lori komunidade no estudante Oekusi tomak nia lian husu ba oitavu governu ho atu foti medida ho lais ba preokupasaun ne’ebe mak agora daudauk povu no estudante atone oan enfrenta.
“Ho momentu ida ne’e METO hakarak husu ba Governu atu buka dalan hodi bele fasilita estudante no komunidade atoni-oan mai fali Dili, no mós husu ba Ministru transporte no telekomunikasaun (MTK) no diresaun nasionál transporte marítima atu kontrola presu ró privadu sira nian ne’ebe mak loron ba loron presu ticket aumenta sa’e,”nia hakotu (Lee Notísia Seluk Iha Jornál Timor Post/Asesu You Tube Timor Post)
810 total views, 3 views today
Bele hare Video Seluk :