(Reportajen Jaime Pires/Editor Mateus da Cruz)
DILI (Timor Post)- Komandu Jerál Polísia Nasionál Timor-Leste (PNTL), simu ona karta husi Vise-Ministru Interior (V-MI), António Armindo, atu kaptura Autór ne’ebé uza ID falsu iha Facebook hodi públika informasaun atu tiru lider Nasionál Kay Rala Xanana Gusmão no José Ramos Horta.
“Sim, Sua-Exelénsia Vise Ministru haruka ona karta mai, no ida ne’e tama ona estratéjia ita nia hodi buka tuir ID falsu ne’e,” dehan Portavós Komandu Jerál PNTL, Superintendente Xefe Armando Monteiro, ba jornalista sira liuhusi konferénsia imprensa ne’ebé mak realiza iha, Kaikoli, Sábadu (23/04).
Nia reforsa, tanba ne’e agora ida ne’e mós tama ona ba sira nia planu no estratéjia hodi buka tuir ID Falsu ida ne’e hodi prosesu tanba, nia lori Vise-Ministru Ministru nia naran no lider balun nia naran.
“Maibé Vise Ministru rasik deklara ona katak ne’e informasaun ne’ebé mak falsu, no husu ba públiku lalika fiar Informasaun ida ne’e, tanba ne’e AiD falsu ne’ebé mak laiha responsabilidade mak halo propaganda falsu,” hatete Nia.
Maibé tanba karta husi Vise-Ministru tun ona ba Komandu jerál nune’e agora daudaun PNTL halo ona planu no estratéjia hodi buka tuir suspeitu ne’e.
Antes ne’e, Vise-Ministru Interior, António Armindo deklara ona katak informasaun ne’e falsu, no laiha lider ida mak orienta nia hodi tiru lider nasionál sira liu-liu hanesan Kay Rala Xanana Gusmão no José Ramos Horta.
Vice Ministru ne’e husu ba PNTL atu fó seguransa másimu ba líder nasionál sira hanesan Xanana Gusmão, Ramos Horta, Taur Matan Ruak, Fransisco Guterres Lú Olo, Mari Alkatiri, Lere Anan Timur, no sira seluk tan.(Lee Notísia Seluk Iha Jornál Timor Post/Asesu You Tube Timor Post)
441 total views, 6 views today
