(Reportajen Jaime Pires/ Editor Mateus da Cruz)
DILI (Timor Post)- Kandidatu Prezidente Repúblika ho númeru sorteiu 1, José Ramos Horta, hatete, durante tinan lima nia mandatu, sei implementa buat ne’ebé maka nia hetan durante hamutuk ho povu no tinan 40 esperiénsia nu’udar diplomata iha rai li’ur.
“ha’u sei halo saida mak durante ne’e povu fó fiar mai ha’u, hodi durante tinan 40 ba halo diplomata iha rai li’ur, ha’u sei lori esperiénsia sira ne’e hodi serve povu no rai ida ne’e,” nia dehan liuhusi konferénsia imprensa ne’ebé realiza iha Sede kandidatura, Hudi-Laran, Kinta (21/04).
Nia hatete, iha nia mandatu, sei esforsu bolu lider sira hotu, partidu polítiku hodi halo diálogu atu bele hamutuk dezenvolve povu no nasaun ida ne’e ba oin.
“Ha’u sei hakbesik-an ba líder nasionál sira hotu hodi bele halo diálogu no hamutuk ita halo dezenvolvimentu ba rai ho ita nia povu,” nia dehan.
Alende diálogu, premiadu Nobel da Pas ne’e mós sei esforsu oinsá bele salva ekonomia iha Timor-Leste, tanba agora daudaun roda ekonomia iha Timor-Leste monu ba daudaun.
Entretantu tuir rezultadu final hosi apuramentu munisipál iha STAE, horisehik, fó sai katak kandidatu José Ramos Horta manan maioria iha eleisaun segunda volta ho votu 397.145 (62,09%) enkuantu kandidatu ho númeru sorteiu 2, Francisco Guterres Lú Olo hetan votu 242.440 (37,91%).
Maski rezultadu ne’e sei provizóriu tanba sei halo fila fali apuramentu nasionál iha CNE, maibé ho rezultadu ne’ebé hetan posibilidade boot kandidatu ne’e maka sei eleitu hanesan prezidente repúblika ba períodu 2022-2027. (Lee Notísia Seluk Iha Jornál Timor Post/Asesu You Tube Timor Post)
612 total views, 3 views today
Bele hare Video Seluk :
Subscribe to Timorpost
