(Reportajen Estaziadu Sergio Baptista Lelan/Asistente Editor Hermenegildo da Costa Tilman)
Dili (Timor Post)—Xefe Observadór Misaun Observasaun Eleitorál (MOE), husi Uniaun European (UE), Ruiz Devesa liu husi konferénsia imprensa, hatete, prosesu votasaun iha territóriu Timor laran tomak la’o di’ak, kalma, dame, transparente tanba iha servisu hamutuk hatudu rezultadu pozitivu.
“Preparativus sira ba prosesu votasaun organizadu tebes husi parte autoridade eleitorál sira, prezensa husi fiskál sira husi kandidatu ida-idak no observasaun nasionál sira halo prosesu ne’e, kalma, dame, transparente,” Dehan Ruiz Devesa, ba jornalista sira iha Salaun Hotel Timor Dili, Kuarta, (20/04).
UE nia observasaun kona ba eleisaun segundu volta, no agora sei iha prosesu kontajen de votu seidauk remata, hatudu ona valor pozitivu katak povu Timor, sempre kalma no orden hodi hein rezultadu final. Nia dehan
“Durante prosesu eleisaun iha segunda volta, emisora públika Rádiu-Televizaun Timor-Leste (RTTL) fornese kobertura editoriál ekuitativa ba kandidatu nain-rua liu husi debate, no estasaun privadu Grupu Mídia Nasionál (GMN) kontinua favorese Ramos-Horta hodi hato’o programa liu-liu planu kandidatura.” nia tenik
Nia subliña, eleisaun hanesan kompetetivu ida, liu husi kampaña hala’o ho maneira Pasífiku tebes, problema ne’ebé mak ita sei enfrenta mak rede sosiál sei sai preokupasaun boot, tanba ne’e presiza ita nia haree hamutuk iha loron ikus.
Kona ba partisipasaun votante, númeru husi feto ne’ebé partisipa iha eventu kampaña ki’ik, kompara ho primeiru volta nian, maski iha feto nia partisipasaun ativu nu’udar oradór, no asuntu empoderamentu.
Prezensa Observadór Misaun Observasaun Eleitorál UE iha Timor komesa husi fulan Fevereiru nia laran no ninia observasaun direita hahú husi eventu kampaña to ba eleisaun hahú, no UE mós koloka nia membru 40 sai hanesan observadór eleisaun iha 160 estasaun votu iha munisípiu 12 no Rejiaun administrative espesiál Oekusi Ambenu.
“Deklarasaun preliminár misaun observasaun eleitorál UE ida ne’e sei entrega antes prosesu eleitorál tomak remata, tanba sei hela etapa importante balu, inklui rezultadu finál no desizaun ba reklamasaun karik iha, MOE UE mantein nafatin hodi observa prosesu eleitorál ne’ebé seidauk remata”, Nia hakotu. (Lee Notísia Seluk Iha Jornál Timor Post/Asesu You Tube Timor Post)
333 total views, 3 views today
