(Reportajen: Jornalista Estaziadu Beatris Belo/Editór Marcos Fernandes)
Dili(Timor Post)—Tuir dadus provizóriu iha Prizaun Bekora hatudu katak, dadur hamutuk na’in-472, iha na’in-13 maka serteza la vota, tanba dadur na’in rua ba halo tratamentu iha rai li’ur no na’in 11 sidadaun estranjeiru.
“Dadur iha Prizaun ne’e hamutuk na’in- 472 ne’ebé sei partisipa iha festa demokrasia ne’e, maibé iha na’in rua la bele vota, tanba halo tratamentu iha rai li’ur no na’in 11 seluk sidadaun estranjeiru, ne’ebé sira ne’ebé tuir vota hamutuk na’in-459, dehan Diretór Prizaun Bekora, João Domingos, ba Jornalista sira iha Prizaun Bekora, Tersa (19/04).
Nia dehan, iha primeira volta hosi dadur ne’ebé iha na’in neen maka la tuir vota.
“Ami iha Guarda Prizionais hamutuk atus ida resin, balu vota iha prizaun ne’e no balu ba vota iha li’ur, tanba sira Volga hela”, dehan Diretór Prizaun Bekora.
João esplika, agora seidauk fá sai rezultadu loloos dadur hira maka seidauk vota no hira maka vota ona, tanba eleisaun sei la’o hela, bainhira eleisaun hotu ona maka foin hatene loos, dadur hira maka vota no hira maka la vota.
Esperansa ho Prezidente Repúblika foun ne’ebé maka kaer ukun iha nasaun ida ne’e, oinsá maka bele servisu hamutuk hodi haree dadur sira iha prizaun sira iha Timor Laran ne’e.
“Ita mós iha dadur moras mental na’in-16, tanba ne’e depende ba sira, se sira hakarak vota bele, se la lakohi vota, ita labele obriga, situasaun la dun di’ak tenke respeita sira”, nia ko’alia.
Diretór ne’e dehan, iha mós dadur feto na’in haat, oras ne’e daudaun hala’o hela tratamentu, bainhira re-koopera bele fila fali ba iha prizaun Gleno.
Tuir observasaun iha terrenu nota katak, oras ne’e daudaun iha Prizaun Bekora dadur sira kontinua vota hela no hetan seguransa hosi PNTL no akompaña mós hosi Guarda Prizionais sira.(Lee notísia seluk iha Timor Post/Asesu You Tube Timor post)
362 total views, 3 views today
