DILI—Sekretáriu Jerál Partidu União Demokrata Timorense (UDT), atúal Deputadu Bankada UDT iha Parlamentu Nasionál, Francisco David Xavier Carlos, afirma, nia parte mantein nafatin prinsípiu sentru moderadu iha kualker situasaun polítika.
Tanba ne’e, Francisco hatete, UDT prontu koopera ho forsa polítika sé de’it maka iha interese liu ba povu no nasaun nia moris di’ak. Nune’e, hanesan partidu ne’ebé asentu parlamentar kiik seidauk hetan kontaktu formal ruma husi partidu boot rua, FRETILIN ho CNRT atu hetan solusaun ba impase polítika atuál.
“To’o Agora ami hein hela iha xamada formal ida para hodi bele ko’alia. Nebe ami seidauk iha buat ida para atu bele adianta,” Francisco subliña ba Timor Post iha Uma Fukun Parlamentu Nasionál, Kinta (20/02/2020).
“Pozisaun ami nia mantein tuir ideolojia polítika partidu, ami sentru moderadu hein hela de’it haree buat ida ke di’ak favorese ba povu, ami tuir de’it, ida ne’e de’it,” Francisco salienta.
Entretantu Partidu Demokrátiku (PD) simu tiha ona proposta ba formasaun governu dasia husi Prezidente CNRT, Kayrala Xanana Gusmão, maibé iha loron Kinta (20/02/2020) lorokraik maka PD sei fó resposta hafoin konferénsia nasionál.
Iha parte seluk, Sekretáriu Jerál FRETILIN, Marí Bim Amude Alkatiri hatete, nia lakohi oho a’an ho formasaun governu dasia hamutuk ho CNRT. Nune’e, nia dehan, FRETILIN prepara forsa ba kaer ukun iha eleisaun jerál 2023.
Alkatiri konsidera problema dadauk ne’e nia hún mak entre Prezidente CNRT ho Prezidente Repúblika kona-ba lista membru pendente sira ne’ebé seidauk simu posse iha governu daualu. Tanba ne’e, nia husu atu Xanana ho Lú Olo hakotu problema ida ne’e.
Entretantu PLP la interese ona ho formasaun governu hamutuk ho CNRT tanba konsidera orsamentu jeral xumba iha parlamentu nasionál ne’e hatudu CNRT soe tiha ona PLP.
Tuir fonte kredivel haktuir KHUNTO iha hela komunikasaun di’ak ho CNRT ba formasaun governu foun, hamutuk ho PD, UDT/FM no PUDD. (ato)
850 total views, 3 views today
