(Reportájen Jeremias Soares/Editora Suzana Cardoso)
DILI (Timor Post) – Kandidatu Prezidente Republika ho numeru sorteiu-1 José Manuel Ramos Horta prontu simu rezultadu eleisaun ronda daruak nian.
“Iha demokrasia ha’u iha konfiansa atu manan. Maibe demokrasia bele iha rezultadu misteriozus. Ne’e duni ha’u mentalmente prontu simu rezultadu ne’ebe di’ak, entrega ba ha’u responsabilidade tinan lima mai ne’e hanesan prezidente. No mós kalmu para simu rezultadu seluk karik.”
Eis Prezidente Republika José Manuel Ramos Horta informa lia hirak ne’e ba Jornalista hafoin ezerse ninia direitu vota iha sentru votasaun Sede Suku Meti-Aut, Tersa (19/04). iha maizu menus tuku 7:00 dadeer OTL.
Nia promote, bainhira eleitu sei tun ba ko’alia ho partidu politiku sira ne’ebe mak hetan asentu iha Parlamentu Nasional, hahu ho Fretilin nu’udar partidu boot iha Parlamentu Nasional para halo diálogu.
“Ne’e hanesan ha’u nia prioridade absoluta para halo saída. Primeiru rezolve problema kona-ba violasaun konstituisaun. Problema iha Parlamentu no Governasaun. Hafoin ne’e ita define saída mak importante liu to’o 2023,” katak Ramos Horta hodi hatutan.
Ba Ramos Horta kestaun sosial, umanitaria no ekonomika tenke haree problema ne’e. Tanba ho krize boot mundial, buat hothotu folin sa’e.
Horta dehan, dissolve Parlamentu la’ós prioridade. Prioridade mak oinsá hadi’a tiha kestaun violasaun konstituisaun, rejimentu Parlamentu no oinsa hadi’a parte ne’ebe lá korresponde ba regras no lei kona-ba formasaun Governu.
“Ne’e ha’u sei halo tuir ho dialogu no partidu sira hothotu, inklui Fretilin, PLP no KHUNTO. Tanba, sira mak halo parte Governu ne’e. Ita haree oinsa hetan solusaun ne’ebe mak di’ak ba Raí ida ne’e”, Horta hatete. (Lee notisia seluk iha jornal Timor Post/Asesu You Tube Timor Post)
590 total views, 3 views today
Bele hare Video Seluk :