(Reportajen Cesario Sousa/Estaziadu Cardenio Alves/Editor Mateus da Cruz)
Dili (Timor Post)— Estrutura partidu Frente Mudansa lamenta ho Prezidente Sesante, Egidio de Jesus, ne’ebé lori naran partidu nian hodi partisipa iha kampaña kandidatu Prezidente Repúblika Lú Olo.
Frente Mudansa suspende tiha ona kargu Prezidente Interinu husi Egidio de Jesus, liuhusi enkontru nasionál iha loron 18 to’o 19 Dezembru de 2021, tanba komete iha kazu korrupsaun. Agora daudaun Prezidente Partidu Frente Mudansa atuál assume husi, Cesár Vital Morreira no Sekretáriu Jerál asume husi Ricardo Cardoso Nheu.
Tanba ne’e, Frente Mudansa ne’ebé ninia orijen mai husi Grupu Fretilín Mudansa, hakfodak bainhira Sekretáriu Jerál Partidu Fretilín, Mari Alkatiri, simu Egidio de Jesus hodi involve iha kampaña ba kandidatu Prezidente Repúblika Lú Olo nian, enkuantu desizaun Egidio nian ne’e kontra desizaun partidu nian ne’ebé deside fó apoiu ba kandidatu Ramos Horta.
“Frente Mudansa hakfodak bainhira haree Sr. Egidio de Jesus sein fó koñesimentu ba estrutura tomak Partidu Frente Mudansa nian hato’o deklarasaun polítika lori Partidu nia naran ba apoiu kandidatu seluk ne’ebé la’ós bazeia ba desizaun partidu nian”, deklara Portavós Partidu Frente Mudansa, Daniel Pereira, liu husi konférensia imprensa iha sede Partidu Villa Verde, Kinta (14/04).
Portavós hatete, Prezensa Egidio de Jesus nian bele hamihis no hatún kredibilidade Partidu Fretilín no kandidatu Lú Olo ne’ebé hakarak kombate korrupsaun iha sosiedade nia leet.
Bazeia ba atus hirak ne’ebé temi iha leten, Frente Mudansa hakarak deklara ba públiku katak, Frente Mudansa liuhusi enkontru nasional ou konferénsia ka kongresu, sei ezenora Egidio de Jesus husi Frente Mudansa.
“Deklarasaun ida ne’e ami hato’o nu’udar counter polítika partidu nian hodi hasoru deklarasaun Polítika ne’ebé hato’o husi Egidio de Jesus, Frente Mudansa konsidera ninia deklarasaun iha kampaña ba kandidatu Lú Olo ne’e Mamuk, tanba laiha militante ka estrutura Partidu FM ne’ebé apoiu no Ia’o hamutuk ho nia,” hateten portavós.
Portavós ne’e hakarak apela ba povu toma katak Frente Mudansa ninia pozisaun klaru fó apoiu total ba kandidatu Jose Ramos Horta atu sai Prezidente Repúblika ba períodu 2022 to’o 2027.
Frente Mudanca partisipa ativu tebes, dezde Primeiru rounde iha atividade kampaña, ne’ebé halo diálogu no door to door hodi kontribui ona ba vitória kandidatu Jose Ramos Horta nian, komesa husi nivel nasionál, munisípiu, suku no to’o aldeia.
Nune’e portavós husu ba militante prepara-an hakat ba Sentru Votasaun iha dia 19 de Abril de 2022, vota ba Kandidatu númeru 1, Jose Ramos Horta ba Prezidente Repúblika, periodu 2022 too 2027.
1,023 total views, 3 views today
Bele hare Video Seluk :