(Reportajen Jaime Pires/Editor Mateus da Cruz)
Dili(Timor Post)— Kandidatu prezidente repúblika Ramos Horta, rekoñese problema edukasaun iha Timór Leste sériu tebes no presiza buka solusaun hodi rezolve.
“Ohin hasoru malu ho Asosiasaun Universidade Institutu Privadu, no reitór sira hotu-hotu no sira mak husu atu enkontru ho Maun Boot Xanana ho ha’u rasik, hodi ko’alia kona-ba dezafiu ne’ebé Juventude no setór edukasaun enfrenta,” dehan Horta, hafoin enkontru iha JL-Vila, Fatuhada, Tersa (12/04).
Nia hatete, elojiu tebes reitór Universidade Privadu sira ne’e nia ideia, tanba sira mak hahú, tanba ne’e ba oin tenke buka solusaun ba ida ne’e.
“Enkontru ida ne’e sei kontinua halo tan ba oin hodi hakle’an ideia balun no foti solusaun ba ida ne’e ba oin, hodi bele hadi’a setór edukasaun iha Timor-Leste tomak enfrenta,” nia dehan.
Entretantu, Klibur Instituisaun Ensinu Superior Privadu Timor-Leste, hamutuk 15, ohin hasoru Kandidatu Prezidente Repúblika, José Ramos Horta no Líder Nasionál Kay Rala Xanana Gusmão hodi hato’o sira nia preokupasaun kona-ba durante ne’e kolokasaun Orsamentu Jerál Estadu ba edukasaun mínimu tebes.
“Ami ohin husi reitór universidade privadu hamutuk 15 hato’o ba lider na’in rua katak, tinan hirak nia laran ne’e aplikasaun orsamentu ba edukasaun ne’e mínimu tebes, 6% no 7% de’it”, dehan Prezidente Klibur Instituisaun Ensinu Superior Privadu Timor-Leste, hanesan mós Reitór (IOB), Pedro Ximenes.
Nia hatete, iha enkontru ne’e lider na’in rua fahe ideia barak relasiona ho edukasaun no buat balun ne’ebé mak sira ko’alia no sira rekoñese iha duni buat balun no dezafiu entermu kualidade edukasaun.
“Tanba ne’e lidér na’in rua ohin fó ideia di’ak, no akumula ona preokupasaun ida hirak ne’e, hotu ba oin sei buka solusaun ba problema sira ne’e hotu”, nia dehan.
Ikus liu nia dehan, iha enkontru ne’e reitór sira mós rekomenda ba kandidatu Ramos Horta, karik manan iha eleisaun ne’e bele tau importánsia ba setór edukasaun nian.
2,381 total views, 3 views today
Bele hare Video Seluk :
Subscribe to Timorpost
