(Reportajen Jaime Pires/Editor Mateus da Cruz)
Dili (Timor Post) – Prezidente Komisaun Nasionál Eleisaun (CNE-sigla Portugés), José Agostinho Belo, dehan, CNE sei la fó sansaun ba kandidatu Prezidente Repúblika, José Ramos Horta no Francisco Guterres Lú Olo ne’ebé insulta malu durante kampaña.
“Tanba ita la aprova sira nia programa, ne’ebé ita atu fó sansaun halo nusa ? Ba sansaun ne’e eleitór sira mak sei fó sansaun liu hosi sira nia votu”, nia dehan ba jornalista sira iha Timór Plaza, segunda (11/04).
Nia hatete, povu agora matenek, kandidatu sira ne’ebé ko’alia la tuir sira nia programa no hatene maka insulta malu de’it, povu maka sei fó sansaun sosiál liu hosi votu.
Maibé kona-ba kandidatu na’in rua hamosu irregularidade iha kampaña, CNE sei entrega ba PDHJ, CAC no PNTL maka sei aplika tuir lei ne’ebé iha ona.
“Ko’alia kona-ba krime ne’e la’ós de’it CNE ninia regulamentu maibé kuandu ko’alia kona-ba krime iha instituisaun seluk mak hanesan PDHJ, CAC, polísia no ministériu públiku,”nia dehan.
Maski CNE hanesan órgaun regulador no ekivalénsia ba eleisaun sira maibé tuir nia, daudaun ne’e seidauk iha sansaun ida prioridade ba kandidatu sira ne’ebé komete erru iha tempu kampaña eleisaun prezidensiál.(Lee notisia seluk iha Timor Post/Asesu You Tube Timor post)
877 total views, 3 views today
