(Reportazen Estaziadu Mariano Abi/Asistente editor Hermenegildo da Costa Tilman)
Dili (Timor-Post)—Movimentu União Patriota Urbana (MUPU), nu’udar organizasaun ida, ne’ebe foin estabelese hodi halibur pesoal Eis-Militar (petisionariu) Timor oan 2006 sira, ne’ebe mak iha vizaun hanesan, ba promove unidade, paz, estabilidade no dezenvolvimentu nasional iha Timor-Leste.
Tuir portavoz MUPU, Nelson A. da Silva Perreira, hatete, realidade durante ne’e hatudu katak, iha parte barak mak sempre utiliza ona ami nia ezistensia, nu’udar instrumentu iha atividade ou movimentu politiku oin-oin, hodi ikus mai fó deit benefisiu politiku, no liu-liu benefisiu ekonomia ba sira, sen ami nia kuinesimentu.
“Tanba ne’e, atu hapara tiha hahalok iresponsabilidade hirak ne’e, ami Eis-Militar Timor oan 2006 sira ne’ebe mak hamahon-an iha MUPU hakarak hato’o ami nia pozisaun loloos, liu hosi pontu deklarasaun hirak nune’e, ami husu ho respeitu ba parte ou movimentu iresponsabilidade sira, atu hapara ona hahalok ne’ebé hakarak esplora deit ami nia ezistensia, hodi atinje sira nia interese politiku ekonomia,” nia dehan ba jornalista sira liu husi konferensia imprensa iha Fatuhada, Sabadu (09/04).
Nia sublina, istoria pasadu ita tenke husik ba kotuk, sai hanesan memoria ida, tan ne’e ami eis-militar 2006 lamenta no kondena maka’as ba hahalok simpatizantes no politiku na’in balun ne’ebe duun matak Dr. Horta no Maun boot Xanana Gusmao nu’udar autor ba krize 2006, em realidade Dr. Ramos Horta no Maun Xanana mos sai vitima iha krize ne’e.
MUPU husu ba lider no simpatisantes partido politiku sira, atu lalika hatudu liman ba malu kona-ba krize 2006 nian iha kampaña ELPRES tinan ida nee, maibé konsentra deit ba programa hirak ne’ebe ho objetivu atu hadia povu nia moris, nia hatete.
“Ami husu ba maluk Eis-Militar Timor oan 2006 sira, mai ita hotu kontinua firme, no labele monu ba lasu propaganda falsu sira, hosi kualker lideransa politika ou grupu interesadu ruma, ne’ebe mak bele estraga fali paz no estabilidade iha Timor-Leste.
“MUPU hamrik ho sentidu ida hodi fó apoiu masimu ba vitoria Kandidatu Dr. José Ramos Horta, iha Eleisaun Presidensial segundu ronde 2022 ne’e. Hodi nune’e bele ba hatuur hikas orden konstitusional RDTL, no rekupera hikas imajen RDTL iha mundu internasional,
Movimentu União Patriota Urbana, husu ba parte hotu-hotu, liu-liu Juventude Timor oan iha teritoriu Timor lanran tomak, atu kontinua kontribui nafatin ba paz no estabilidade iha ita nia rai doben Timor-Leste. Hakotu (Lee Notisia Seluk Iha Jornal Timor Post/ Asesu You Tube Timor Post)
847 total views, 3 views today
Bele hare Video Seluk :
Subscribe to Timorpost
