(Reportajen Jaime Pires/Editor Mateus da Cruz)
Dili (Timor Post)- Ekipa susesu kandidatu Prezidente Repúblika, Francisco Guterres Lú Olo, Fernando Gusmão, kritika Komisaun Nasionál Eleisaun (CNE), no Polísia Nasionál Timor-Leste (PNTL), la hatudu imparsialidade, ba kampaña José Ramos Horta nian iha Ermera Atsabe.
Nia dehan, horisehik kinta (07/04), iha Atsabe, instituisaun públika envolve iha monitorizasaun kampaña la hatudu autoridade tanba husik de’it kandidatu José Ramos Horta no Partidu CNRT viola regra estadu nian no kandidatu José Ramos Horta ho Partidu CNRT tau sira nia an iha regra eleitorál nia leten maibé laiha relasaun husi CNE no PNTL.
“CNE nu’udar entidade públika ne’ebé tenke halo supervizaun ba eleisaun prezidensiál ida ne’e tuir regra hatuur husi estadu, PNTL nu’udar autoridade públika ne’ebé iha devér atu garante kumprimenta regra estadu nian, maibé Kandidatu Prezidente Repúblika José Ramos Horta no Partidu CNRT iha Atsabe, kampaña liu tiha oras to’o kalan boot maibé autoridade rua ne’e la halo intervensaun,” deklara Fernando, iha Luz Clarita, sesta (08/04).
Tanba ne’e, sira ohin haruka ona karta protesta ba CNE, katak Kandidatu José Ramos Horta no Partidu CNRT, viola regra estadu nia, iha lei N⁰ 4/2017 no aprova alterasuan dalimak ba lei N⁰ 7/2006.
“Sira mós viola dekretu governu N⁰ 3/2022 alterasaun dahuluk ba dekretu governu N⁰ 5/2017, ne’ebé regula kampaña no propaganda eleitorál, kona-ba limitasaun tempu kampaña eleitoral, artigu 11, husi dekretu ne’e regula katak, propaganda eleitorál bele akontese de’it husi tuku Ualu dadeer to’o tuku neen ho balun lokraik,” deklara.
Tanba ne’e sira kontinua husu CNE atu toma atensaun ba kandidatu José Ramos Horta no Partidu CNRT ne’ebé mak viola ona regra eleitorál, hodi bele fó xamada no CNE mós iha kompeténsia hodi bele espulsa kandidatu refere ho Partidu CNRT.
828 total views, 3 views today
Bele hare Video Seluk :