(Reportajen Jaime Pires/Editor Mateus da Cruz)
Dili (Timor Post)- Vise-Ministru Interior (V-MI), António Armindo dehan, estatutu reforma membru Polísia Nasionál Timor-Leste (PNTL), ne’ebé mak idade avansadu finaliza ona no tempu badak sei aprezenta ba iha Konsellu Ministru (KM) hodi deside.
“Kona-ba estatutu membru PNTL no lei organiza PNTL nia ekipa jurídiku ministériu Interior no ministériu defeza nian finaliza ona iha semana ne’e, semana oin ita lori ona konsellu ministru,” nia dehan bá Timor Post, kinta ne’e.
Nia hatete, lei organiza hotu ona no haruka ona ba ministru prezidensiál konsellu ministru no fahe ona ba ministériu hotu-hotu hodi fó nia paraser hodi hein atu deside iha konsellu ministru.
“Tanba ita nia membru PNTL, barak mak idade ona sira balun saúde ladún di’ak ona, entaun presiza reforma hodi trata sira nia saúde,” nia afirma.
Tanba durante ne’e tuir nia, estatutu PNTL la define kona-ba reforma membru PNTL sira ne’ebé mak idade ona, entaun agora ida ne’e sai prioridade ba oitavu governu liu-liu ministériu interior hodi finaliza ida ne’e.
“Iha estatutu ida define membru sira ne’ebé mak tama ona ba idade (60) ba (65) reforma ona, maibé orasida desizaun konsellu Ministru mak ita haree took, mantein ho ida ne’e ka bele muda,” nia hakotu. (Asesu Notísia Seluk Iha Jornál Timor Post/ Asesu You Tube Timor Post)
987 total views, 3 views today
Bele hare Video Seluk :