(Reportajen Cesaltina Ximenes/Editor Mateus da Cruz)
DILI— Prosesu investigasaun ba kazu Ró Transship II, besik tama iha faze finalizasaun, tanba prosesu ne’e parte Ministériu Públiku mak halo akompañamentu.
Diretór Jerál Investigasaun CAC, José Verdial, hatete durante nee ekipa Tékniku investigadór sira iha inisiativa nafatin buka tuir prova tanba prosesu nee iha ona indísiu ba krime partisipasaun Ekonomia e Negósiu.
“Liga ba prosesu investigasaun ró Transship II nee, ita entrega auto inkéritu ba Ministériu Públiku, entaun nia prosesu Ministériu rasik mak prosesa no besik finaliza, no prosesu nee iha indísiu ba krime partisipasaun ekonomia”, nia dehan ba jornalista sira iha KAK, Faról, Kuarta (06/04).
Nia dehan, parte CAC kontinua ho seriedade akompaña prosesu investigasaun ba kazu ró Tranship II, ne’ebé oras-ne’e iha ona Ministériu Públiku (MP) nia liman ne’ebé nia envolvimentu autór prinsipál mak parte lideransa balu hosi Autoridade Portuariu rasik.
Enkuantu, ba kazu ne’e rasik tanba Ministru Transporte no Komunikasaun (MTK), José Agostinho da Silva anunsia ofisiálmente katak, ró KMP Transship II, hosi Surabaya, Indonézia hahú substitui ró-ahi Berlin Nakroma no Success, iha Tersa, 25 Maiu 2021 halo kontratu ho ró-ahi KMP Transship II hosi kompañia estranjeiru Atralata Estrategi hosi Indonézia, ho kada fulan selu $220.000, ne’ebé iha kapasidade tula pasajeiru hamutuk na’in 300, inklui sasán ho tonelada 1.000-resin.
Razaun substituisaun ne’e tanba ró-ahi Berlin Nakroma avaria dezde tinan 2020, to’o agora seidauk hadi’a tanba situasaun COVID-19, no ró-ahi Success ba manutensaun durante fulan-tolu iha Indonézia, dezde tinan tolu hala’o operasaun iha Dili la halo manutensaun.
Tanba Nee iha loron 04 Juñu 2021, ekipa hosi CAC, akompaña hosi Diresaun Nasionál Transporte Maritime (DNTM), hahú halo inspesaun ba ró ne’e hodi hatene kona-bá kondisaun no mós buka hatene kona-bá prosesu kontratu, molok hala’o operasaun.
Iha inísiu inspesaun ne’e, maka iha loron 08 Juñu 2021, Ministru MTK, José Agostinho da Silva, deklara katak, bazeia ba rezultadu inspesaun DNTM, katak ró KMP Transship II iha kondisaun di’ak atu halo operasaun.
Nune’e, iha loron tuir mai 11 Juñu 2021, Ró ne’e transporta Primeiru-Ministru (PM), Taur Matan Ruak ho komitiva (Membru Governu lubuk ida), inklui Konselleiru másimu Partidu KHUNTO, José dos Santos Naimori Bucar viajen traballu ba Postu Administrativu Atauru, maibé susar atu atraka iha portu, ikus-mai tenke fila-fali mai Dili ho ró Kay Rala.
Ho situasaun ne’e, iha loron 12 Juñu 2021, Ministru MTK, José Agostinho da Silva, ezije fila-fali ba tékniku ró-ahi KMP Tranship II, atu submete relatóriu ofisiál ho loloos ba parte investigadór-sira tanba deskonfia mákina ró nian mak avaria.
Iha loron ne’e kedan, liuhosi publikasaun CAC nian iha pájina Facebook ofisial Komisáriu Adjuntu CAC ba Asuntu Prevensaun no Sensibilizasaun, Luis de Oliveira Sampaio, orienta ekipa prevensaun korrupsaun hodi hala’o inspesaun ba ró Tranship II Gresik Indonesia ne’ebé Governu liuhosi MTK aluga hodi substitui Berlin Nakroma no Success ne’ebé avaria.
MTC liu hosi Diresaun Nasionál Transporte Marítima (DNTM) nu’udar autoridade ne’ebé ezekuta mandatu bazeia ba nomeiasaun hosi Diretór DNTM ho númeru ofísiu: MTC/098/DNTM/VI/2021 – data 01/06/2021 ho asuntu nomeiasaun inspesaun téknika ba ró-ahi Success no MTC/100/DNTM/VI/2021, datada 02/06/2021 ho asuntu nomeiasaun inspesaun téknika ba Transip II.
CAC, ezekuta tan mandadu buska aprensaun ba APORTIL, liuhosi Diresaun Cabotage, relasiona ho prosesu aluga ró ne’e. CAC halo ezekusaun buska no domisíliu inklui prende sasán bazeia ba mandadu Tribunal Distritál Dili (TDD) ho NUC 007/21.CAC TL, ne’ebé hala’o iha edifísiu Portu Dili.
Iha prosesu buska ne’e, ekipa investigadór-sira rekolla dokumentu ne’ebé liga ba Prosesu aprovizionamentu, tanba diresaun ne’e mak halo inspesaun ba ró no halo rekomendasaun hodi fó ba superiór iha Ministériu Transporte no Komunikasaun (MTK), inklui Ministru rasik hodi foti desizaun aluga ró ne’e, maibé deskonfia ró ne’e ho kondisaun la favoravel, hodi halo operasaun inklui kustu kontratu selu boot tebes.
Dokumentu sira sei sai hanesan matéria hodi reforsa investigasaun tuir-mai, atu dezenvolve prova, no bele loke prosesu investigasaun tuir-mai.(Lee notisia seluk iha Timor Post/Asesu You Tube Timor post)
2,295 total views, 3 views today
Bele hare Video Seluk :
Subscribe to Timorpost
