(Reportajen Cardenio Alves/Asistente Editor Hermenegildo da Costa Tilman)
DILI (Timor Post)— Sekretariadu Estadu Formasaun Profisionál no Empregu (SEFOPE), ohin, halibur traballadór na’in 59 hamutuk ho ida-idak nia família hodi asina akordu ho SEFOPE kona-ba komitmentu traballadór sira atu ba servisu iha Korea Súl.
“Servisu iha Korea ne’e difisil, durante tempu Covid-19, ita nunka halo mobilizasaun ba Korea no Australia, maibé depois situasaun normal nasaun rua ne’e komesa loke odamatan mai ita, hodi husu ita atu bele haruka ita nia traballadór sira ba servisu iha ne’ebá,” hatete husi Diretór Nasionál Empregu Exterior SEFOPE, Filomeno Soares, iha fatin Hotel Timor Lodge Komoro Dili, tersa, (05/04).
Tuir nia, objetivu lori Traballadór na’in limanulu-resin-sia (59), atu mai halo komitmentu ida kona-ba governu liu husi SEFOPE ho família Traballadór sira, atu nune’e bainhira sira ba servisu tuir dalan ne’ebé mak legal.
“Buat ne’ebé mak presiza hatene maka parte Governu nunka obriga Traballadór sira atu ba servisu iha ema nia rai,maibé kna’ar governu nian kria kondisaun ba oportunidade ne’ebé Timor oan sira hakarak aproveita”.
Nia dehan, deklarasaun ne’ebé mak ohin traballadór na’in-59 asina, iha area rua hanesan Peska ho Fabrika, husi traballadór ne’ebé mak sei koloka ba area peska nian hamutuk nain-25, no parte fabrika nian hamutuk nain-29, nain-4 husi traballadór ne’ebé antes ne’e servisu ona iha Korea maibe fila tiha, agora hakarak ba fali, ho nune’e traballadór ne’ebé mak ohin asina kontratu hamutuk nain-59.
“Mobilizasaun ne’ebé ita halo ba da-hat ona, komesa iha tinan 2022, ne’ebé mak governu Korea loke hahú iha Fulan Janeiru to’o fulan Abríl, no hahú husi Abríl to’o Dezembru tinan oin iha planu atu haruka traballadór barak liu fal,” dehan.
Iha parte seluk, Embaixadór Korea Iha Timor Leste, Kim Jeong Ho, hatete, durante ne’e situasaun global hanesan pandemia Covid-19 halo servisu SEFOPE nian la la’o, maibé daudaun situasaun la’o ho di’ak, komesa rekruta traballadór Timor ba Servisu iha Korea,
“Ita hanesan traballadór tenke tau-an hanesan ema servisu na’in ida iha Korea, no tenke tuir kultura ka regra ne’ebé mak kompañia rasik tau no mós tuir saida mak lei Korea nian, tanba Korea hanesan fatin lalehan no infernu”, nia subliña.
Reprezentante traballadór, Arlindo Alves dos Santos hatete, ba servisu iha Korea ne’e ha’u nia hakarak no prontu husik inan aman, no oan sira ba servisu tanba moris mak obriga.
“Buat ne’ebé ha’u tenke halo mak, tuir saida mak lei no regra nasaun nian ne’ebé mak kompañia hanesan peska ka fabrika nia fó ba ami atu servisu tuir, no ha’u kompromete ba ha’u nia aan ha’u sei halo tuir saida mak SEFOPE ko’alia, katak labele sai husi sistema ba hanesan ema ilegál,”. Nia hakotu. (Lee Notisia Seluk Iha jornal Timor Post/Asesu You Tube Timor Post)
99 total views, 3 views today
