(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Progresu adezaun Timor Leste ba ASEAN, daudaun ne’e la’o pozitivu tebes, tanba iha koordenasaun di’ak entre Inter-Ministerial, ne’ebé mak lidera husi Ministériu Negósiu Estranjeiru no Kooperasaun (MNEK).
“Prosesu ne’e la’o pozitivu tanba ho kontribuisaun no envolvimentu másimu liña Ministerial hotu, no koordenasaun husi MNEK nian, tanba MNEK ne’e hanesan Ministériu ne’ebé mak lidera prosesu ne’ebá oin,” dehan Diretora Jerál asuntu ASEAN, Milena Rangel, iha iha Salaun MNEK, Pantai Kelapa, Tersa (05/04).
Nia hatutan, prosesu la’o intensivu, nune’e hein katak, iha semana rua nia laran, TL sei hetan vizita ida husi Indonézia, ekipa husi pillar ekonomia nian, tanba tinan oin, sira mós preza de ASEAN, ne’ebé ita hein saida mak sei akontese iha tinan ne’e.
Timor-Leste atu adere ba ASEAN ninia preparasaun importante maka pillar tolu atu bele sai membru ba ASEAN, hanesan pillar ekonomia, Seguransa no Sósiu-Kulturál.
Maizumenus presiza atu serbisu maka’as, ezije duni serbisu husi liña Inter ministeriál sira hotu atu haree hamutuk ba preparasaun oinsá maka hadi’a Rekursu umanu, adekuadu no enkuadramentu legal balu atu bele halo aliñamentu armonizasaun ba ezijénsia husi rejiaun.
“Kona ba dezafiu ne’ebé mak akontese, Ministerial hotu tenke servisu koopera hamutuk la’ós ba MNEK de’it, los katak sempre iha difikuldade, maibé tanba iha kooperasaun ba malu buat hotu la’o pozitivu, liu-liu impase polítika ne’ebé ita enfrenta, depois ho Covid-19, halo misaun ne’e labele mai, se Covid-19 mak la akontese TL bele kompleta ona misaun tolu ne’e,” nia relata.
Nia hatete, agora buat hotu-hotu fila fali ba normal ona, entaun misaun sei mai iha tempu badak nia laran hodi ko’alia kona ba diversifikasaun ekonómiku, hodi integra ba merkadu Rejiaun, tanba, konserteza TL hola parte iha rejiaun nia laran, agora ne’e kestaun tempu de’it, hakotu. (Asesu Notísia Seluk Iha Jornál Timor Post/ Asesu You Tube Timor Post)
3,544 total views, 3 views today
Bele hare Video Seluk :