(Reportajen Germandina Xavier/Asistente editor Hermenegildo da Costa Tilman)
Dili (Timor Post)– Ministériu Edukasaun Juventude no Desportu (MEJD) no Radio Televizaun Timor Leste (RTTL.EP), ohin, asina akordu hodi kontinua publika programa Eskola ba Uma no Tele eskola.
“Objetivu asina ne’e atu RTTL.EP kontinua públika programa Eskola Ba Uma no Tele Eskola hodi fasilita estudante sira ne’ebé la konsege asesu ba prosesu aprendizajen liu-liu iha situasaun pandemia Covid-19,” dehan Diretór Jerál Planu, Polítika, Inkluzaun no Impresaun (DG PPII)-MEJD, Raimundo José Neto iha salaun VIP-MEJD, Vila-Verde.
Nia hatete, ekipa ne’ebé halo observasaun, programa ne’e iha vantajen di’ak ba estudante, nune’e MEJD deside kontinua prodúz filmajen ne’ebé ho konteúdu edukativa no sai arma rezerva ba MEJD hodi fasilita estudante sira bainhira hasoru situasaun ne’ebé sai prejudika ba prosesu aprendizajen prezensiál.
Iha sorin seluk, Prezidente Administrativu RTTL.EP, José Antonio Belo, hatete, papél RTTL.EP nian maka atu ajuda instituisaun estadu nian hodi hatutan no habelar informasaun ba komunidade sira tanba nu’udar mós obrigasaun ida atu kontribui ba dezenvolvimentu edukasaun.
“Programa ne’ebé MEJD prodúz ne’e konsidera importante tebes liuliu ba labarik sira nia futuru no nasaun, ami sei kontinua públika” nia hakotu. (Lee Notísia Seluk Iha Jornál Timor Post/Asesu You Tube Timor Post)
748 total views, 3 views today
