(Reportajen Estaziadu Mariano Abi/Editor Mateus da Cruz)
Dili (Timor Post) – Ministériu Koordenadór Asuntu Ekonómiku (MKAE) ho Komisaun Funsaun Publika (CFP sigla Portugés) fó pose ba funsionáriu foun Institutu de Apoiu Dezenvolvimentu Emprezariál (IADE), hamutuk na’in-11, kompostu husi feto na’in-7 no mane na’in-4.
Institutu de Apoiu Dezenvolvimentu Emprezariál (IADE), ne’ebé tutela iha Ministériu Koordenadór Asuntu Ekonómika, hanesan fornesedor prinsipál ba serbisu dezenvolvimentu emprezariál, apoiu formasaun emprezariál no serbisu dezenvolvimentu oi-oin dezeñadu atu fó apoiu ba emprezariál potensiál ne’ebé mak eziste iha sira nia negósiu.
Ministru MKAE, Joaquim Amaral, liu husi ninia diskursu, hato’o parabéns ba selesionadu na’in 11 ne’ebé pasa ona iha rekrutamentu hodi sai funsionáriu permanente iha IADE.
“ha’u lori Governu no Primeiru Ministru nia naran fó parabens ba iha resenia pasadu na’in-11 tanba finalmente selesionadu hanesan funsionáriu permanente iha IADE,” nia dehan iha Salaun enkontru IADE, Mandarin, Tersa, (29/03).
Nia hatete, Institutu ida ne’e simu kna’ar todan tebes tanba presiza forma ema ho koñesimentu, talentu ba sai emprezariu, tanba ne’e bainhira funsionáriu sira hola parte ona iha família IADE, tenke hatudu kualidade no kontribuisaun hanesan família boot IADE, no IADE nia papél importante tebes ba RDTL.
Entretantu, prezidente Komisaun Funsaun Públika, Faustino Cardoso Gomes, husu ba funsionáriu sira ne’ebé simu ona pose atu halao servisu tuir ida-idak ninian kompeténsia no knaar.
“Ha’u lori Funsaun Publika nia naran, hato’o kongratulasaun ba imi, no benvindu iha família boot Funsaun Publika ninian, mai ita hamutuk, oinsa asegura Funsaun Publika ida ne’ebé imparsiál ho responsabilidade, servisu ho kualidade no haktuir ba padraun kualidade ne’ebé aas,” nia dehan.
Nia mós haree katak hosi funsionáriu na’in 11 ne’e maioria feto, tanba ne’e nia enkoraja nafatin promove aas liu tan partisipasaun feto sira nian iha serbisu publiku nian.
Nune’e mós, Diretór Ezekutivu IADE, Filomeno Marcelino Belo, hatete, tuir loloos iha na’in-16 maka atu simu pose maibé iha na’in-5 seluk sei iha prosesu laran, tanba durante prosesu rekrutamentu ne’e iha vaga haat maka sira labele liu, entaun sei hein atu anunsia fali.
“Ba ami IADE orgullu loos, tanba durante ne’e ami serbisu ho na’in-95 funsionáriu permanente iha teritoriu tomak, ne’e ki’ik oan loos, entaun ami nia servisu barak liu, duke ema, nune’e grasa de deus ohin ita bele fó tan tomada pose ba selesionadu na’in-11 hodi mai hamutuk iha IADE.
“ami espera katak, ho sira nia prezensa bele tulun ona Instituisaun, hodi bele fó arendamentu atu nune’e Realiza programa ne’ebé IADE iha territóriu Timor laran tomak no fó asisténsia tékniku ba Ita nia emprezáriu sira,” nia dehan.
Nia hato’o agradese ba MKAE tanba durante ne’e apoiu orsamentu ba IADE hodi bele apoiu emprezáriu sira liu husi formasaun no tékniku sira seluk, inklui planu negósiu inovativu.
“Antes ne’e ami nia orsamentu ne’e mak dolar amerikanu 800 ou 900 ital de’it la to’o rihun ida, maibé MKAE nia prezensa grasa de deús bele apoiu ami to’o rihun ida, ba tinan ida ne’e nian, atu bele fó apoiu ba emprezáriu sira liu husi formasaun no tékniku sira seluk, inklui planu negósiu inovativu,” nia dehan.
Entretantu oras ne’e daudaun atividade iha terrenu la’o namanas hela,ba emprezariu mikro ki’ik sira iha Baukau, Maliana, Vikeke, inklui Dili halo iha AHMTL. (Asesu Notisia Seluk Iha Jornal Timor Post/ Asesu You Tube Timor Post)
763 total views, 6 views today
Bele hare Video Seluk :
Subscribe to Timorpost
