(Reportajen Jaime Pires/Editor Mateus da Cruz)
Dili (Timor Post)- Vise-Ministru Interior (V-MI), António Armindo, rekoñese Instituisaun PNTL to’o agora kontinua hasoru problema barak liu-liu kapasitasaun ba membru sira no fasilidade ne’ebé sei mínimu, maibé governu sei esforsu rezolve problema sira ne’ebé polísia sira enfrenta.
“Sim, PNTL kontinua hasoru problema Infraustutura, no menus kapasitasaun ba membru sira PNTL, tanba ne’e ita kontinua esforsu maka’as hodi rezolve problema sira ne’e,” nia dehan ba jornalista tersa ne’e..
Nia hatete, esforsu ne’ebé governu sei halo maka sei buka meius oinsá halo Kooperasaun ho parte relevante sira no parseiru sira hodi responde kona-ba problema ne’ebé instituisaun PNTL hasoru.
“Sei esforsu, maski la rezolve hotu maibé bele kontinua hadi’a nafatin rekursu no infraestrutura ba sira hodi bele hamenus problema ne’ebé mak sira enfrenta,” tenik nia.
Lee Notisia Relevante : Aniversáriu ba dala-22, PNTL Kontinua ‘Halerik’ Menus Fasilidade no Kapasitasaun
Antes ne’e iha ámbitu aniversáriu PNTL nian ba dala 22 foin lalais, Komisáriu Jerál Polísia Nasionál Timor-Leste (PNTL), Faustino da Costa, hatete, oras ne’e daudaun PNTL sei kontinua hasoru dezafiu barak hodi dezenvolve instituisaun ne’e sai forte hanesan nasaun avansadu sira seluk, liu-liu kapasitasaun ba membru sira no ekipamentu ba PNTL ne’ebé sei menus.
“PNTL harii iha tinan 2000 agora tinan 22 ona, ne’ebé iha buat barak mak halo mudansa inklui ba infraestrutura PNTL, nia maski balun sei menus, maibé ko’alia kona-ba dezafiu ne’e barak tebes mak ita hasoru, liu-liu kapasitasaun ba membru sira no mós ekipamentu,” nia dehan ba jornalista sira, hafoin selebra aniversáriu PNTL, iha Sentru Formasaun Polisia, Komoro, Domingu (27/03).
Nia hatete, agora iha era modernizasaun ne’e presiza halo kapasitasaun di’ak liután ba membru sira no mós rekursu materias hodi antesipa ba tipu modelu krime ne’ebé agora mosu barak tebes ne’ebé la’ós fasil atu implementa. (Asesu Notísia seluk iha Jornál Timor Post/ Asesu You Tube Timor Post)
571 total views, 3 views today
