(Reportajen Jaime Pires/Editor Mateus da Cruz)
Dili (Timor Post)- Primeiru Ministru (PM), Taur Matan Ruak, hatete, nia sei foti lisensa anuál hodi ba reforsa kandidatu Prezidente Republika ho numeru sorteiu 6, Francisco Guterres Lu Olo, iha kampaña eleisaun prezidensiál segunda rounde, ne’ebé tuir oráriu sei realiza iha fulan Abril ne’e.
“Ha’u pasti sei hamriik, iha tempu badak ha’u sei hasai ha’u nia lisensa, ha’u nia Vise-Primeiru Ministru, Armanda Berta mak sei lidera to’o kampaña hotu ha’u fila fali,” Nia dehan bá jornalista sira iha Salaun Canosa, Domingu (27/03).
Primeiru Ministru la fó sai detallu data hahú foti lisensa, maibé nia dehan iha tempu badak sei foti lisensa annual hodi ba partisipa iha kampaña eleisaun prezidente repúblika segunda volta.
Kona-ba Primeiru Ministru nia espoza, Izabel Fereira, ne’ebé nu’udar mós kandidatu iha eleisaun ne’e deside fó nia apoiu ba kandidatu Ramos Horta, tuir Taur, iha demokrasia ema hotu iha direitu atu hili kandidatu se de’it tuir nia opsaun polítika.
“Demokrasia ne’e iha ha’u nia uma laran, hanesan relijiaun mós ketak-ketak, partidu mós balun iha FRETILIN, CNRT no PLP, ne’ebé ida ne’e laiha problema, tanba ida ne’e mak demokrasia loloos,” subliña.
Entretantu, daudaun ne’e partidu haat maka fó sira nia apoiu ba kandidatu Lú Olo hodi hetan vitória iha eleisaun prezidente tinan ne’e, maka hanesan iha Fretilin, PLP, Khunto no Os Verdes.(Asesu Notísia seluk iha Jornál Timor Post/ Asesu You Tube Timor Post)
664 total views, 3 views today
Bele hare Video Seluk :