(Reportajen Jaime Pires/Editor Mateus da Cruz)
Dili (Timor Post)- Relasiona ho sasán folin ne’ebé agora sa’e maka’as, Prezidente Kámara Komérsiu Indústria Timor-Leste (CCITL, Sigla Portugés), Oscar Lima, husu públiku atu labele fó sala ba emprezáriu sira tanba sasán sira agora folin sa’e ne’e mai nanis hosi fabrika.
“Ita labele fó sala fali katak dehan, emprezáriu sira iha ne’e mak hasa’e, maibé mai kedas husi ema nia fatin fabrika,” dehan nia hafoin enkontru ho emprezáriu sira, iha Salaun CCI-TL, Akait, Sesta (25/03).
Nia dehan, sasán sira iha fabrika agora folin sa’e impaktu hosi invazaun Rúsia iha Ukránia ne’ebé mak agora sei kontinua hela, alende ne’e problema seluk ró atu tula sasán mai mós laiha.
“Ró agora tula sasán iha konteiner mai ne’e hela ida de’it mak sei hakarak mai, restu ne’e lakohi hotu ona tanba mai para iha Portu Dili kleur, entaun ema selu impostu karun, nune’e mós sasán iha prontu atu hasai lalais mós difisil,” nia dehan.
Ho problema ida ne’e, nia dehan, sira nia parte sei hasoru governu liuliu ministériu relevante, atu husu aumenta tan ema ba servisu iha Portu Dili hodi hasai sasán iha konteiner no iha Ró laran, tanba iha Portu Dili ema menus.
Nia mós hatete, iha fulan ida ka rua mai sirkulasaun mina iha merkadu menus tanba na’in ba fabrika produs mina la autoriza ona atu importa mina mai Timor Leste.
“Mina goreng ne’e fulan ida ka rua mai tan laiha loos ona, tanba ema iha ne’ebá la autoriza atu lori mai ita nia rai,”nia haktuir.
Maski nune’e tuir, Oscar hatete, sira sei tenta ko’alia ho governu no embaixada sira hanesan, Indonézia Malázia, Tailandia no seluk tan hodi bele hatama mai, maski sasán karun maibé bele mai hodi labele afeta ba povu iha rai laran.
679 total views, 3 views today
Bele hare Video Seluk :