(Reportajen Germandina Xavier/ Asistente editor Hermenegildo da Costa Tilman)
Dili (Timor Post)— Prezidente Ekipa Susesu Kandidatu Prezidente Repúblika períodu 2022-2027, ho númeru sorteiu,,,Constâncio Pinto, Adi Jose Andre Pinto, hatete, kandidatu se de’it maka manan iha eleisaun prezidente tenke sai ezemplu pas ba joven sira hotu iha Timor laran.
”Ami nia esperansa ba rezultadu ne’ebe iha karik Horta ou Lú Olo mak sai Vitoria iha segundu rounde ami esperansa sai nafatin instrumentu paz iha nasaun ida nee no labele iha situasaun polítika de’it maibé iha tempu dezenvolvimentu tenke sai modelu ba jerasaun foun,”nia hatete, ba jornalista Timor Post iha nia servisu fatin Eis PM Balide, Kuarta (23/03).
Nia hatete, ekipa susesu ba kandidatu Constancio ba tinan ne’e la konsege lori rezultadu di’ak tuir tarjetu ne’ebé iha maibé ida ne’e hanesan esperiénsia foun ida, no ba oin sei kontinua hadi’a. Maski rezultadu sees husi esperansa maibé tanba realidade polítika maka nune’e, desizaun hotu povu maka deside.
Ekipa susesu agradese ba povu no militante sira ne’ebé maka fó ona votu ba kandidatu Constancio Pinto.
”Ami husi ekipa susesu nafatin esforsu tanba foin primeira vés kompete iha eleisaun ida ne’e hanesan pasu primeiru ne’ebe ami hakat no sei esforsu makas iha períodu tuir mai,” nia dehan.
Kona-ba desizaun apoiu ba kandidatu na’in rua ne’ebé posibilidade hakat ba segundu ronde, nia dehan, sira nia pare to’o agora seidauk deside atu fó sira nia apoiu ba kandidatu na’in rua.
”Ami mós seidauk deside apoiu se de’it maibé ami nafatin fó kontribuisaun ba kandidata rua nee ba kompetisaun ida nee maski diferente tebes no ami apresia tanba ita povu iha maturidade ne’ebé boot no konxiénsia ne’ebé aas maski iha diferensa polítika,” tenik.
Ikus liu, dala ida tan nia hato’o Parabéns ba kandidatu na’in rua hanesan Jose Ramos Horta no Francisco Guterres Lú-Olo ne’ebé posibilidade boot hakat ba segunda rounde ho esperansa boot bele hadi’a nasaun ida ne’e di’ak liu tan.
992 total views, 3 views today
Bele hare Video Seluk :