(Reportajen Jose Caet/editor Augusto Sarmento)
DILI (Timor Post)-Komandante Jerál Polisia Nasionál Timor-Leste (PNTL), Faustino da Costa, hatete iha sesaun dadeer eleisaun prezidensiál 2022 situasaun iha teritóriu laran tomak la’o hakmatek.
Tuir nia, eleitór hothotu tenke partisipa, tanba partisipasaun importante, maibé nu’udar sidadaun votu segredu.
“Too oras ne’e daudaun situasaun iha territóriu tomak la’o hakmatek, soke ita akompaña asidente no akontesimentu balun Polisia asegura, mais sidauk iha situasaun grave,” Faustino informa ba hafoin vota hotu iha Sentru Votasaun SD Faról, Sábadu (19/03).
Maski akontese situasaun balun ne’ebé fiskais lori urna ba sentru votasaun iha munisípiu Covalima ho udan no mota boot, maibé ekipamentu hotu too duni sentru votasaun.
“Ha’u dehan beibeik katak festa demokrasia se de’it hakat ba sentru votasaun atu ezerse ninia direitu”, nia hateten.
Maibé, sidadaun hothotu tenke hatene katak, kandidatu sira deklara tiha ona. Kandidatu hirak ne’e, se mak eleitu ba Prezidente Repúblika la’ós ba organizasaun ka partidu mais Prezidente Repúblika ba povu tomak.
“Tanba ne’e mak ita hothotu tenke simu demokrasia sira hanesan ne’e, labele dehan fali nuxa mak ami nian la manan”, nia fó hanoin.
Membru Polisia Nasionál Timor-Leste hamutuk na’in 400 resin aloka hotu ba sentru votasaun tantu nasionál no munisípiu.
Bainhira mosu buat ruma la’o laloos, prosesu hotu tenke tuir lei, labele hola fali desizaun mesak iha dalan. Presiza lori prosesu ba Tribunal Rekursu atu bele deside.(*)
675 total views, 3 views today
Bele hare Video Seluk :