(Reportajen Jaime Pires/Editor Mateus da Cruz)
Dili (Timor Post)- Kandidatura Prezidente Repúblika ho independente, hamutuk na’in-7 asina deklarasaun hasoru Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE-Sigla Portugés), tanba falta preparasaun ba eleisaun prezidensiál.
Kandidatura Independente sira ne’ebé mak asina deklarasaun ne’e mak hanesan, kandidata Izabel da Costa Ferreira, Angela Freitas, Milena Pires, Rogerio Lobato, Virgilio Guterres’Lamukan’, Constancio Pinto no Antero Bendito.
“Ami kandidatu independente na’in-7 ba eleisaun prezidensiál 2022-2027, ne’ebé asina deklarasaun hato’o protestu no preokupasaun, tanba ami haree STAE no CNE falta preparasaun ba eleisaun prezidensiál ne’ebé mak realiza aban ne’e,” deklara portavós Kandidata Prezidente Repúblika independente, Milena Pires, liuhusi konferénsia imprensa ne’ebé realiza iha, Fatuhada, Sesta (18/03).
Nia dehan, sira hetan informasaun katak órgaun eleitorál STAE, la halo atualizasaun ba lista votante iha kadernu eleitorál iha sentru votasaun paralelu sira. Iha votante balun buka ba atuliza sira nia informasaun, maibé ofisiál sira husi STAE haruka fila de’it, bainhira ba fali ofisiál sira dehan taka tiha ona
Problema ida seluk maka STAE no CNE mós laiha informasaun klaru asesivel ba ema hotu kona-ba sidadaun sira liu-liu estudante sira ne’ebé atu vota iha sentru votasaun paralelu, tanba iha informasau katak ba sira ne’ebe atu vota iha sentru votasaun paralelu sei halo kuak tiha sira nia kartaun..
“Iha informasaun balun katak, votantes balun liu-liu estudante sira, bainhira ba rejistu iha sentru paralelu votasaun nian, ofisiál STAE nia hatete ba sira katak, sei halo kuak sira nia kartaun eleitorál. kartaun eleitoral ne’e importante, sira la konkorda atu halo kuak sira nia kartaun no nu’udar konsekuensia sei labele ba vota,”lamenta.
Kandidatu sira haree katak ho preparasaun mínimu ne’e preozudika votante barak, sei labele ezerse sira nia direitu ba vota.
Votante sira ne’ebé sei hetan efetivu husi failansu ne’e mak hanesan, Traballadór seasonal sira, Timoroan sira ne’ebé mak foin ba Austrália, Timoroan sira ho rezidénsia permanente iha Austrália maibé iha tinan 2017 ba oin sira tuir eleisaun iha Timor-Leste, tanba ne’e bainhira la atualiza kadernu eleitoral sira mós labele vota iha Austrália.
Depois votante sira iha Reinu Unidu (Inglatera, Paizes de Gales, Irladia do Norte no Eskosia), ne’ebé foin ba no sira ne’ebé iha ne’ebá uluk ona maibé la halo resensiamentu iha tinan 2018 mós labele ezerse sira nia direitu.
Ho problema ida ne’e kandidatu na’in hitu husu ba CNE no STAE atu hadi’a failansu sira ne’e hotu, atu nune’e labele akontese tan iha futuru liu-liu iha eleisaun prezidensiál.
1,362 total views, 3 views today
Bele hare Video Seluk :
Subscribe to Timorpost
