(Reportajen Olga Soares/Editor Mateus da Cruz )
DILI (Timor Post)— Prosesu distribuisaun material sensitivu non sensitivu ba iha Munisípiu no Postu Administrativu la’o di’ak, no daudaun ne’e materiál hirak ne’e prontu hotu ona iha Sentru Votasaun.
“Informasaun ne’ebé ha’u simu hosi Diretór STAE Munisípiu sira hato’o katak serimónia distribuisaun materiál sensitivu non sensitivu la’o di’ak, inklui mós munisípiu Dili nian ne’ebé mak dadeer kedas halo transportasaun urnas ba postu Administrativu sira la’o ho kondisaun di’ak hotu”, informa Acilino ba jornalista sira iha STAE Dili, Sesta (18/03).
Nia hatete, prosesu distribuisaun ba postu sira no ba sentru votasaun sira iha territóriu timor laran hetan akompañamentu másimu hosi observadór nasionál no internasionál, fiskais kandidatura no autoridade importante sira, no hetan seguransa másimu hosi komandu PNTL munisípiu.
Hafoin to’o iha sentru votasaun hotu iha territóriu timoa laran, material eleisaun sira ne’e sei hetan seguransa hosi PNTL hafoin dader sei entrega ba brigada no ofisiais hodi hahú votasaun.
“Ohin kalan ita nia brigada no ekipa monitorizador sira, seguransa PNTL, sei hela hamutuk iha kada sentru votasaun, to’o aban tuku 6: 00 dadeer, hosi parte seguransa sei entrega sasán hirak ne’e ba iha brigada no ofisiais sira atu hahú loke urna ne’ebé iha hodi halo preparasaun atu nune’e tuku 7:00 dadeer bele ona hahú eleitór sira ezerse sira nia direitu votu,”nia esplika.
Hafoin ne’e, nia hatutan, iha tuku 15:00 lorokraik, maibé depende ba iha sentru ididak, karik eleitór sira sei barak iha formatura, kuandu votasaun remata lori ba prosesu kontajen iha sentru votasaun ida-idak nian.
Tuir dadus ne’ebé iha total eleitores ne’ebé sei tuir votasaun iha eleisaun tinan ne’e hamutuk 859 613, Sentru votasaun 1200 no estasaun de votu 1500.(Lee Notisia seluk iha Jornal Timor Post/ Asesu You Tube Timor Post)
1,165 total views, 3 views today
