(Reportajen Jaime Pires/editor Mateus da Cruz)
Dili (Timor Post)- Iha kampana ikus kandidatu Lú Olo, Horta, Lere no Berta, Polísia Nasionál Timor-Leste (PNTL), konsege prende motorizada hamutuk 300.
Deklarasaun ne’e hato’o husi, Komandante PNTL, Munisípiu Dili, Superintendente Xefe, Henrique da Costa ba jornalista sira hafoin partisipa serimónia formatura jerál iha Kuartél Jerál PNTL Kaikoli, kinta (17/03) ne’e.
“Durante loron tolu ikus kampaña Prezidensiál nia iha Munisípiu Dili, ita prende motorizada lubun ida husi militante, Kandidatura Prezidente Repúblika nian,” dehan Nia.
Nia deklara, motor sira ne’e prende husi militante no simpatizante husi partidu sira hanesan FRETILIN, CNRT ho KHUNTO, inklui mós balun husi militante kandidatura independente, Lere Anan Timur nian.
“Ita prende husi loron primeiru, 14 Marsu, hamutuk motór 40, loron daruak tuir mai, 15 Marsu, hamutuk motór 112 no loron datoluk motor 148,” dehan Henrique.
Komandante ne’e aumenta, motor sira ne’e prende tanba, la kumpre sinasi Tranzitu nian hanesan, espellu motor la tau, uza kanu resin, la taka helem no balun tula malu ema na’in tolu.
“motorizada hirak ne’ebé ami identifika, uza kanu-resin, balu la uza espellu, balu la taka kapasete, balu tula ema na’in-tolu, motorizada sira ne’e agora iha hotu ona Komandu Munisípiu Dili, Kaikoli,” tenik Nia.
Ho ida ne’e, ba motorizada sira simu hotu ona Billete husi Polísia Tranzitu Munisípiu Dili, hodi selu multa iha banku hafoin bele foti fali sira nia motorizada.
“Sira ne’ebé mak uza kanu resin, ita sei hasai, ita husu atu nune’e na’in hodi lori knalpoot ne’ebé estandar, atu nune’e bele ba monta fali, hodi nune’e bele foti, ba sira ne’ebé laiha espellu, tenke ba lori ho espellu, atu selu hotu monta fali espellu nune’e bele foti sai,” hakotu.
823 total views, 6 views today
