(Reportájen Jaime Pires/Editor Mateus da Cruz)
DILI (Timor Post) – Relasiona ho eleisaun prezidensiál ne’ebé sei realiza loron Sábadu, (19/03/202), komunidade sira hahú nadodon ona hosi Kapitál Dili ba munisípiu sira, inklui RAEOA hodi tuir tuir votasaun iha ida-ida ninia munisípiu.
Tuir observasaun Timor Post, iha Terminal Bekora sidadaun sira barak kontinua hein Bus hodi ba Munisípiu, nune’e mós balun ho karreta privadu inklui mós ho motor.
Iha Terminal Bekora, sidadaun sira ne’ebé mak arranka ba Munisípiu hodi tuir votasaun ne’e, maioria joven feto ho mane, no mós estudante sira.
Enkuantu Bus kuaze sanulu resin mak sai ona iha dadeer ne’e, nakonu ho pasajeiru, inklui balun tuur fatin laiha, tabele de’it odamatan no tuir iha leten de’it, tanba hakarak to’o duni iha nia Munisípiu hodi tuir votasaun.
Iha observasaun mós, sidadaun sira balun ho karreta privadu hanesan Truck, kuaze sanulu resin ona mak arranka ona ba parte Lorosa’e nian, maibé iha Truck leten balun dada bandeira partidu FRETILIN hodi viajen ba sira nia moris fatin.
Sidadaun sira ne’ebé mak hein Bus iha Terminal Bekora ne’e, atu arranka ba Munisípiu sira hanesan, Manatutu, Baukau, Vikeke no Lautein, maibé maioria husi Munisípiu Baukau.
Balun mós mai hein Bus dezde dadeer to’o agora seidauk ba tanba karreta arraska sira hadau malu hafoin bele sa’e, maibé sira kontinua hein karreta seluk hodi hakarak ba ezerse duni sira nia votu ba kandidatu Prezidente Repúblika entre na’in (16) ne’e ida hanesan sidadaun Timoroan.
La’ós de’it, iha Terminal Bekora, maibé hanesan mós Terminal sira seluk hanesan, Taibesi, Tasi-Tolu mós nakonu ho sidadaun sira husi parte Loromonu no Rai-Klaran nian hodi bá tuir votasaun. (Lee notísia seluk iha jornál Timor Post/asesu YouTube Timor Post)
961 total views, 3 views today
Bele hare Video Seluk :