(Reportajen Jose Mauno/Editor Mateus da Cruz)
DILI—Diretór Jerál STAE, Acilino Manuel Branco, rekonese, iha bulletin de votu balun maka naklees no foer iha Suai maibé problema ne’e STAE munisípiu Covalima nian rezolve ona.
Acilino hatete, problema buletin naklees no fo’er la’os akontese de’it iha Suai maibé iha munisípiu sira seluk mos hanesan ezemplu Maliana, Oekusi, Bobonaro no seluktan, problema ne’e akontese tanba tinta maka kona no problema ida seluk mai kedas hosi impresaun.
“Ida ne’e la’ós kuak maibé naklees no fo’er tanba tinta mak kona, akontesimentu ne’e la’ós iha Suai de’it maibé iha mós munisípiu seluk, bulletin sira ne’ebé mak naklees no fo’er órgaun eleitorál deside la uza iha loron votasaun tanba reprezentante kandidatura sira, PNTL, CNE no STAE asina ona akta durante verifikasaun,”nia dehan iha nia knaar fatin Kaikoli, kuarta (16/03).
Nia hatete, iha prosesu produsaun STAE fó ba parte impresaun nian aumenta kedas 10% husi eleitór hamutuk 859.613 hodi antesipa problema sira hanesan ne’e, maibé prosesu hotu sei iha akta.
Iha mós informasaun ne’ebé espalla katak iha Bobonaru urna monu tanba estrada la di’ak maibé motorista foti kedas lori ba iha STAE munisípiu.
Tuir informasaun ne’ebé mak asesu iha media sosiál katak, akontese iha Maliana kaixa bulletin de votu monu iha dalan parte Tunubibi komunidade sira hili fó kedas ba responsavel lori ba iha STAE munisípiu.
Nune’e mós, iha STAE munisípiu Kovalima identifika bulletin de votu hamutuk 138 kuak no fo’er.
571 total views, 3 views today
Bele hare Video Seluk :