(Reportajen Cardenio Alves/Editor Mateus da Cruz)
DILI (Timor Post)- Diretór Fundasaun MAHON, Angelo Fernando Ximenes, konsidera partidu politiku sira aproveita de’it joven sira iha tempu kampaña, maibé bainhira atinji tiha sira nia objetivu hodi ukun, ikus mai nega no haluha tiha joven sira.
Iha tempu kampaña, lider polítiku sira uza juventude hodi harame sira nia palku, mobiliza joven husi fatin ida ba fatin seluk no pinta-an tun sa’e hakilar viva! Maibe liu tiha eleisaun haluha lakon.
“ami husu ba partidu politiku sira atu labele aproveita deit joven sira iha tempu kampana, tanba ami haree dala ruma militante sira hetan dezastre iha konfrontru maibé lider partidu sira la konsidera joven sira nia nia luta durante kampana hodi lori vitoria ba sira,” nia kestiona iha nia knaar fatin Ex-Heliport Bairo-pite, Kinta (10/03).
Nia hatete, esperiénsia tinan 10 resin ona maioria juventude Timor-Leste ba hotu ba rai liur buka servisu tanba iha rai laran laiha fatin ba joven sira hodi servisu.
Tanba ne’e nia husu ba juventude sira iha Timor-Leste di’ak liu foka ba ida-idak nia atividade moris duké mete ba polítika.
“ha’u husu ba juventude sira iha Timor-Leste atu foka ba ida-idak nia atividade prioritária sira hanesan asesu ba edukasaun, estuda, halo toos ou natar labele lakon tempu ba kampana,” nia dehan. .(Lee notisia seluk iha jornal Timor Post/asesu youtube Timor Post)
906 total views, 3 views today
