DILI—Konstituisaun RDTL artigu 86 haktuir kona-ba kompeténsia prezidente repúblika nian ba órgaun seluk, liga ho situasaun polítika atuál iha ne’ebé xefe estadu kaer ba artigu ne’e iha alinea (f) halo dadauk diálogu hodi rona partidu polítiku ne’eb’e hetan kadeira iha parlamentu nasionál, entidade sira no konsellu estadu rasik.
Nune’e, relasiona ho aujénsia Kayrala Xanana Gusmão iha diálogu entre líder istóriku sira ne’ebé prezidente repúblika organiza iha loron 10/02/2020, hodi mosu preokupasaun barak kona-ba Xanana nia partisipasaun nu’udar fatór determinante ida ba solusiona situasaun polítika ne’e, maka nu’udar eis titular, Xanana mós sei hetan hikas konvite husi prezidente repúblika hodi partisipa iha reuniaun ka diálogu konsellu estadu nian, tanba konsellu estadu kompostu husi eis prezidente repúblika, eis primeiru ministru, eis prezidente parlamentu nasionál no reprejentante husi pesoál hirak ne’ebé estadu hili hanesan membru ba konsellu estadu nian.
Artigu 86.f haktuir, prezidente repúblika hakotu Parlamentu Nasionál, iha kazu krize boot institusionál nian ne’ebé labele iha formasaun governu ka aprovasaun Orsamentu Jerál Estadu nian, iha tempu naruk liu loron neen-nulu, bainhira rona tiha ona partidu polítiku sira-ne’ebé hetan kadeira iha Parlementu Nasionál, no rona Konsellu-Estadu, iha tempu ne’ebé laiha kdasar jurídiku atu hala’o disolusaun, tenke haree tuir regra iha Artigu 100; g).
Tanba ne’e, liga ho situasaun polítika atuál iha ne’ebé nia estatutu sae ona ba krize polítika ka impase polítika tanba orsamentu jeral estadu ba tinan 2020 nian la liu iha parlamentu nasionál, maka prezidente repúblika kaer ba Artigu 74. 1. Ne’ebé haktuir prezidente-repúblika maka xefe-estadu, símbulu no garantia independénsia nasionál no unidade estadu nian, no instituisaun demokrátika sira-nia funsionamentu regular, maka prezidente repúblika hala’o dadauk hela diálogu no ikus liu sei konvoka konsellu estadu molok foti desizaun ikus.
Entretantu, kona-ba Xanana la kumpri konvite formal ba dialogu entre líder istóriku sira, Prezidente Repúblika Francisco Guterres Lú Olo afirma, Xanana hanesan líder boot ida nia fi’ar sei lakohi nia povu kontinua moris iha terus no susar nia laran. Nune’e, Lú Olo dehan, sei iha oportunidade atu hasoru malu maibé sei la liu husi telefone.
“Ami hakarak atu hatete la liu husi telefone. Ami ko’alia iha fatin ida ne’e ohin ba oin, maibé se iha tempu, prontu, ita ko’alia oin ba oin di’ak liu,” Lú Olo afirba ba Jornalista sira hafoin lidera diálogu entre líder istóriku sira iha loron 10/02/2020, iha Palásiu Prezidensiál, Bairro-pité, Dili.
Hafoin diálogu Lú Olo ba Jornalista sira subliña pontu tolu ne’ebé líder istóriku sira foti mak hanesan, dahuluk, eleisaun antesipada hanesan rekursu ikus liu; daruak, partidu polítiku sira ne’ebé asentu parlamentar nasionál hotu-hotu tenke halo movimentu polítiku oinsá mak bele dezeña opiniaun no hakarak atu bele hetan solusaun ba impase polítiku ida ne’e; no datoluk, primeiru ministru sei mantein nafatin primeiru ministru ba governu daualu to’o hetan solusaun ba situasaun polítika atuál.
Lú Olo dehan, liuhusi dalan diálogu ida ne’e nia fi’ar katak sei iha solusaun ida ne’ebé di’ak liu ba Timor Leste nia situasaun polítika hodi labele sakrifika nafatin dezenvolvimentu nasionál.
Marka prezensa iha diálogu ne’e líder istóriku no personalidade sira hamutuk na’in lima, inklui Marí Bim Amude Alkatiri, José Manuel Ramos Horta, Taur Matan Ruak, Lere Anan Timur, Roque Rodrigues.
Kayrala Xanana Gusmão maka auzensia iha diálogu ho rajaun tuir konfirmasaun ne’ebé Timor Post hala’o katak, hafoin partisipa entrevista espesial iha televizaun, Xanana aranka kedas ba Lospalos ho objetivu ba kari aifunan ba nia inan hakiak durante tempu rejisténsia, ho naran Jacinta de Jesus, iha Bauro, Lospalos, Munisípiu Lautem. (cao)
1,113 total views, 3 views today
Bele hare Video Seluk :
Subscribe to Timorpost
