(Reportajen Jaime Pires/Editor Mateus da Cruz)
Dili (Timor Post)-Governu liuhusi Ministériu Koordenadór Asuntu Ekonómiku (MKAE) no Ministériu Negósiu Estranjeiru (MNEK), sei tau matan ba traballadór sira ne’ebé Ajénsia Incanto West Grup rekruta atu ba servisu iha Qatar.
Ministru Koordenador Asuntu Ekonómiku (MKAE), Joaquim Amaral, dehan, Ajensia Incanto West Grup hanesan Emprezariu privadu no nia kontaktu direta mós ho Ajénsia iha Qatar oinsá halo prosesu kontratu mobilizasaun joven sira atu ba servisu iha ne’ebá, maibé governu mós iha rekonesimentu ba assina akordu entre Ajénsia rua ne’e.
“kuandu prosesu sira Traballador orsida atu sai ba ne’e nia prosesu ne’e estadu mós sei tau matan, tanba, Kompañia sira ne’ebé mak atu mobiliza Traballador sira ba iha li’ur ita iha mós indimu ne’ebé hare prosesu sira ne’e hotu,” Nia dehan iha Palásiu Governu, kuarta (09/03).
Joaquim hatete, estadu sei kontinua suporta inisiativa setor privadu sira ne’ebé iha ona kooperasaun ho sira nia paradeiru sira iha li’ur, estadu mós sei fó tulun ba sira.
“Ne’ebé ha’u hakarak apela dala ida tan, prosedimentu sira atu mobiliza Traballador sira ba Qatar ne’e governu sei tau matan,” nia dehan
Nia esplika, kona-ba Protesaun sidadaun sira nia iha rai li’ur governu mós sei tau matan, maibé prosesu mobilizasaun atu ba rai li’ur setor privadu mak hasai nia kustu tomak, maibé nia regra sira, preparasaun sira, no saida mak sira tenke kumpre, estadu iha koñesementu ba ida ne’e.
Entertantu Vise-Ministru Negósiu Estranjeiru, Juliao da Silva, hatete, governu iha konesimentu kona-ba traballador ne’ebe atu ba Qatar, nune’e governu sei tau matan.
“Ha’u hanoin Ajénsia Incanto West Grup no Qatar GLOBAL JOBS assina akordu hodi Timoroan atu ba servisu iha ne’ebá ne’e rezultadu husi governu foin daudaun ba partisipa iha Expo-Dubai nian, ne’ebé ami haruka ona karta ba iha Ministériu Koordenadór Asuntu Ekonómiku, se bele asina akordu entre paíz rua ne’e, ” nia dehan.(Lee notisia seluk iha jornal Timor Post/asesu youtube Timor Post)
481 total views, 6 views today
