(Reportajen Jaime Pires/Editor Mateus da Cruz)
Dili (Timor Post)- Ministru Obras Públika (MOP), Salvador Dos Reis Pires, lakohi komentáriu kona-ba nia naran tama iha lista remodelasaun ne’ebé mak sei akontese iha tempu besik.
“Kona-ba ida ne’e ha’u labele ko’alia, tanba ha’u laiha kompetensia, ne’e kompetensia tomak husi Primeiru Ministru (PM), Taur Matan Ruak,” dehan Nia ba jornalista sira iha Palásiu Governu, kuarta (09/03).
Hafoin jornalista sira kontinua halai tuir, Ministru mak husu atu rejigna-an ka primeiru Ministru mak hakarak halo remodelasaun tanba naran tama hotu lista, maibé nia parte Kontinua hatan nia labele ko’alia kona-ba ida ne’e, maibé kompet’ensia tomak iha Primeiru Ministru.
Entertantu, Sekretáriu Estadu Asuntu Veteranu, Gil da Costa Monteiro ‘Oan Soru’ rekonese nia naran tama hotu iha lista remodelasaun, tanba ne’e prontu simu kualker desizaun.
“Ha’u ne’e atu remodelasaun fali ka, ezonerasaun ka pecat mós ha’u prontu hotu”. Oan Soru hato’o asuntu ne’e ba jornalista sira iha kampana Kandidatu ho numeru-14 José Ramos Horta ba dala-8, iha kampu futebol Ainaru Villa, Kuarta (09/03).
Entretantu, iha kampaña kandidatu PR Ramos Horta nian iha Munisípiu Aileu, Domingu (06/03), Oan Soru lekar sai segrudu Governasaun lideradu Taur Matan Ruak nian, ne’ebe mak mandatu besik termina ona nunka halo buat ida.
“Ha’u tenke onestu ba Povu ida ne’e ona, ami nia mandatu besik hotu ona, estrada kilometru ida ami lá halo, fiu metru ida mós ami lá dada, Povu mak terus”, Oan Soru deskbre.
Antes ne’e Primeiru Ministru Taur Matan Ruak, dehan, Remodelasaun ne’e sei akontese duni iha tempu badak.
“Sim sei iha, tanba ne’e kuandu iha remodelasaun ami sei hatete ba ita boot sira,” dehan Nia bá jornalista sira iha Edifisiu, Ministeriu Finansas Aitarak-Laran, Tersa (08/03).
Taur hatete, remodelasaun ne’e mosu normal tanba desde primeiru governu to’o VIlI Governu konstitusionál sempre iha remodelasaun ba membru governu sira.(Lee notisia seluk iha jornal Timor Post/asesu youtube Timor Post)
414 total views, 3 views today
