Reportajen Jaime Pires/Editora Suzana Cardoso
DILI (Timor Post) – Tanba provoka malu maka militante hosi Partidu Khunto no Partidu Fretilín tuda malu hodi rezulta sasán balun hetan estragu no moos militante na’in ida kanek hetan basa iha oin, maski nune’e Polisia Nasionál Timor-Leste (PNTL) sei nafatin halo identifikasaun ba akontesimentu ne’e.
“Sin ohin meiudia ataka malu entre grupu rua. Ida husi grupu militante Partidu Khunto no ida seluk husi militante FRETILIN sira iha area Kota-Lama ninia,” hateten Komandante PNTL Munisípiu Baukau, Superintendente Xefe António Maria de Sá ba Timor Post via telefone, Domingu (06/03/2022).
Superintendente Xefe António esplika liután, akontesimentu ne’e akontese tanba loron Domingu, (06/03/2022) militante Partidu Khunto hosi Postu Administrativu neen tun hotu mai Baukau kota lama hodi atu halo kampañe ba Kandidatura Prezidente Republika Armanda Berta iha Baukau Kampu Food ball, Suku Triloka, Postu Administrativu Baukau Villa Munisípiu Baukau.
Maibé mai to’o iha Baukau villa derrepente militante Khunto tuda malu ho militante Partidu FRETILIN ne’ebé tuur hela iha sira nia fatin. Hosi tuda malu ne’e, PNTL foin maka identifika militante Partidu Khunto na’in ida hetan tuku iha oin.
Katak Superintendente Xefe António, relasiona ho kazu ne’e PNTL seidauk halo kaptura saun tanba ataka malu entre grupu. Nune’e difisil atu identifika autór sira. Maski nune’e, PNTL sei nafatin halo investigasaun.
“Ita seidauk kaer ema ida. Tanba ohin ne’e ataka malu entre grupu entaun difisil atu identifika autór mak ida ne’ebé. Maibé agora ha’u orienta ona komandante postu sira hodi buka tuir sira ne’ebé mak deskonfia involve iha ataka malu ne’e,” dehan Eis Komandante Kovalima ne’e.
Nia subliña, daudaun ne’e ekipa hahú tuun ba halo identifikasaun ba ema sira ne’ebé mak ohin tuda malu ne’e. Prosesu sei la’o hela. Nune’e seidauk iha dadus ema hira mak hetan kanek no komunidade hira mak hetan estraga ba sira nia sasán sira.
Maibé hatutan Superintendente Xefe António, dadus temporariu foin iha ema na’in ida hosi militante partidu Khunto mak kanek tanba hetan tuku iha oin laran. Ekipa PNTL halo ona investigasaun. Nune’e, akontesimentu ne’e ninia prosesu sei kontinua la’o.
Maibé tuir informasaun ne’ebé Timor Post asesu hosi media sosiál hateten, hosi akontesimentu tuda malu ne’e motorizada ida ne’ebé para hela iha loza foto kopia nia oin hetan tuda, hodi rezulta hetan estragu kmaan.(Lee notísia seluk iha jornál Timor Post/asesu You tube Timor Post)
318 total views, 3 views today
