(Reportajen Florindo Coluna/Editor Mateus da Cruz)
DILI (Timor Post)-Relasiona ho deklarasaun Sekretáriu Jerál Partidu Demokrátiku (PD), António da Conceição “Kalohan”, ne’ebé dehan partidu boot rua Fretilín no CNRT uza atributu partidu hodi halo kampaña prezidensiál, Prezidente Komisaun Nasionál Eleisaun (CNE-sigla portugés) hatete, to’o agora nia parte seidauk simu keixa ruma kona-ba kestaun ne’e.
“To’o agora CNE seidauk simu keixa ruma kona-ba ida ne’e, ami seidauk hetan keixa ruma, ami seidauk bele apresia, seidauk fó buat ruma”, dehan Prezidente CNE, Jose Belo ba jornalista iha salaun konferénsia Media Center CNE Kolmera, sesta, (04/03).
Nia dehan, antes kandidatu sira hahú kampaña CNE aviza tiha ona ba sira katak ida-idak utiliza ninia atributu iha kampaña, no tenke kumpre kompromisu sira ne’ebé kandidatu hotu-hotu halo ona.
“Ha’u hanoin ita aviza ona kandidatu hotu-hotu, ida-idak uza sira nia atributu ba kampaña, ami labele atua tanba la’ós benefisiáriu saida, ne’ebé ami husu hotu-hotu kumpre”, Jose Belo hateten.
Nia husu kandidatu sira di’ak liu respeita ida-idak ninia direitu kampaña, maibé utilizasaun ne’e tenke ida-idak ninia atributu.
“Maibé ba sira ne’ebé sente dehan atributu sira nian hato’o keixa ba CNE atu nune’e CNE ho órgaun kompetente sira bele hola desizaun tuir asaun ne’ebé kandidatu sira ne’e komete,” nia hakotu.
Antes ne’e, Sekretáriu Jerál Partidu Demokrátiku (PD), António da Conceição “Kalohan”, konsidera kampaña ne’ebé maka daudaun ne’e partidu boot rua CNRT no FRETILIN halo ne’e la’ós ona kampaña kandidatu prezidente repúblika maibé kampaña partidu polítiku.
“Ami nia kandidatura Mariano Assanami Sabino, PD mak oferese maibé Kandidatu indivíduu, la’ós hanesan agora partidu Fretilín no CNRT ninia halo iha kampaña ne’e uza atributu no hari Bandeira partidu nian iha fatin-fatin, ha’u temi de’it mak partidu boot rua ne’e, CNRT no Fretilin,” dehan Kalohan, iha Sede PD, Kolmera kinta (03/03).
Nia dehan, se Prezidente ida ne’e mak hakarak garante konstituisaun nia tenke hatene kedas ninia interpretasaun kona ba konstituisaun se lae, buat hotu-hotu ita fila fali ba iha 2020. (Lee notisia seluk iha jornal Timor Post/asesu youtube Timor Post)
843 total views, 3 views today
Bele hare Video Seluk :